Y Nadolig yng Ngerddi Dyffryn 2023

1-31 Rhagfyr

Addurno’r Ardd

Allwch chi fod yn un o Gorachod y Gerddi? Eleni mae angen help arnom i baratoi Dyffryn at y Nadolig. Dechreuwch eich ymweliad drwy ychwanegu at ein llwybr rhubanau, yna neidiwch i mewn i sled Siôn Corn am lun.

Yn ardal y Cloestrau ac ardal chwarae’r Pentwr Pren fe welwch olygfeydd Nadoligaidd rhyngweithiol a gemau i’r teulu cyfan. Addurnwch deulu o ddynion eira a pherfformio pantomeim yn y theatr bypedau, neu beth am gystadleuaeth hŵpla’r dyn eira, ras “llwy eira”, gêm o Kerplunk enfawr neu sgitls y Torrwr Cnau? Pwy fydd pencampwr y Nadolig?

I gynhesu, ewch i’r siop lyfrau ail-law yn yr Oriel i ddylunio ac addurno eich torchau ffelt eich hun, a dod o hyd i lyfr bach i lenwi’r hosan Nadolig falle.

Digwyddiadau’r Nadolig

Dydd Sadwrn 9 a Dydd Sul 17 Rhagfyr byddwn yn cynnal gweithdai addurniadau Nadolig i blant. Bydd dwy sesiwn, un am 10.30am-12pm ac un arall am 2.00pm-3.30pm yn yr Oriel. Does dim angen cadw lle ymlaen llaw ac ni fydd angen talu (heblaw’r pris mynediad arferol).

Bydd un o ffefrynnau Dyffryn, Louby Lou, yn ôl ac yn perfformio straeon pop-yp yn yr Oriel ddydd Iau 4 Ionawr. Rhaid cadw lle ymlaen llaw - cadwch lygad am docynnau, a fydd ar gael yn fuan iawn.

Ddydd Mawrth 5 Rhagfyr bydd Rhian o Wild and Fabulous Flowers yn cynnal ei gweithdai creu torchau poblogaidd. Mae’r tocynnau’n £50 am weithdy dwy awr, sy’n cynnwys lluniaeth ysgafn Nadoligaidd. Rhaid archebu ymlaen llaw, darllenwch fwy am y digwyddiad a mynnwch eich tocynnau ar y dudalen digwyddiadau ar ein gwefan.

Mae ambell drît Nadoligaidd arall ’da ni i’w cyhoeddi hefyd, felly cadwch olwg ar ein newyddion diweddaraf i sicrhau na fyddwch chi’n colli unrhyw un o ddigwyddiadau’r Nadolig.

Bydd Nadolig 2023 yng Ngerddi Dyffryn yn achlysur clyd, hwyl, teuluol. O’r hen i’r ifanc, bydd hen ddigon i ddiddanu’r teulu i gyd. A chofiwch rannu eich holl luniau gyda ni ar y cyfryngau cymdeithasol – ry’n ni’n dwlu gweld teuluoedd yn mwynhau ein digwyddiadau yng Ngerddi Dyffryn.