Codwch arian i ni

Mae’r rheolau hyn yn berthnasol i bob gweithgaredd codi arian gwirfoddol. Drwy gofrestru i godi arian ar gyfer yr Ymddiriedolaeth Genedlaethol (elusen gofrestredig 205846), rydych yn cytuno i gydymffurfio â nhw.

Os ydych o dan 18 oed, rydych yn cadarnhau eich bod wedi dangos y telerau ac amodau hyn i’ch rhiant/gwarcheidwad a’u bod wedi cytuno i dderbyn cyfrifoldeb am gydymffurfio â’r telerau ac amodau hyn. 

1. Codi arian

1.1 Rydych yn cytuno i drefnu gweithgareddau codi arian fel cefnogwr annibynnol yr Ymddiriedolaeth Genedlaethol. Dylech felly gyfeirio at godi arian ‘er budd’ yr Ymddiriedolaeth Genedlaethol, yn hytrach nag ar ran yr Ymddiriedolaeth Genedlaethol. 

1.2 Rydych yn cytuno y cydymffurfiwch ag unrhyw gyfarwyddiadau neu ganllawiau a roddir gan yr Ymddiriedolaeth Genedlaethol o ran eich gweithgaredd codi arian, ond eich cyfrifoldeb chi yw trefnu pob agwedd ar unrhyw weithgareddau codi arian a gynhelir gennych. 

1.3 Byddwch yn gyfrifol am unrhyw gostau, trethi neu dreuliau yr eir iddynt neu sy’n codi mewn cysylltiad â’ch gweithgaredd codi arian. 

1.4 Oni bai bod yr Ymddiriedolaeth Genedlaethol wedi rhoi deunyddiau wedi’u brandio i chi o ganlyniad i’ch cofrestriad, ni allwch ond defnyddio enw a logo’r Ymddiriedolaeth Genedlaethol ar gyfer eich gweithgareddau codi arian gyda’n caniatâd ysgrifenedig ni, ac yn unol â chanllawiau brand yr Ymddiriedolaeth Genedlaethol. I wneud cais am ganiatâd, bydd angen i chi roi gwybod i ni sut rydych yn cynnig defnyddio enw a/neu logo’r Ymddiriedolaeth Genedlaethol ar eich deunyddiau eich hun drwy e-bostio giving@nationaltrust.org.uk a rhoi enghreifftiau a/neu samplau o ddefnydd o’r fath i ni os gofynnwn amdanynt.

2. Arian nawdd a rhoddion

2.1 Rydych yn cytuno i dalu’r holl enillion a godir gan eich digwyddiad codi arian i’r Ymddiriedolaeth Genedlaethol cyn gynted â phosibl ar ôl y digwyddiad (ac yn amodol ar unrhyw amserlen y cytunwyd arni), ac yn unol â chyfarwyddiadau’r Ymddiriedolaeth Genedlaethol. Ni allwch ddidynnu unrhyw gostau oni bai eich bod wedi cytuno ar hynny gyda’r Ymddiriedolaeth Genedlaethol. 

2.2 Byddwch yn annog eich rhoddwyr a/neu noddwyr i wneud datganiadau Cymorth Rhodd lle bo hynny’n gymwys, a allai ein galluogi i adennill treth cyfradd sylfaenol ar roddion o’r fath. Mae rhagor o wybodaeth am y cynllun Cymorth Rhodd ar ein gwefan.  

3. Defnydd o ddata personol a chaniatâd  

3.1 Bydd yr Ymddiriedolaeth Genedlaethol yn storio a defnyddio’r data personol a rowch pan fyddwch yn cofrestru i godi arian i ni ar sail gyfreithlon contract. Byddwn yn defnyddio’r wybodaeth a rowch i gysylltu â chi am eich gweithgaredd codi arian a dilyn eich cynnydd.  

3.2 Gallai eich gwybodaeth bersonol gael ei defnyddio hefyd i anfon gohebiaeth atoch lle rydych wedi nodi yr hoffech dderbyn rhagor o wybodaeth am waith yr elusen. 

3.3 Bydd yr holl ddata personol a gedwir gennym yn cael ei drin yn unol â chyfreithiau preifatrwydd perthnasol a datganiad preifatrwydd yr Ymddiriedolaeth Genedlaethol, sydd i’w weld ar ein polisi preifatrwydd.

4. Cynnwys

4.1 Os byddwch yn darparu ffotograffau neu fideos a dynnwyd/recordiwyd yn ystod eich gweithgaredd codi arian i’r Ymddiriedolaeth Genedlaethol, rydych yn cytuno y gall y rhain gael eu defnyddio gan yr Ymddiriedolaeth Genedlaethol at ddibenion masnachol a/neu godi arian. Drwy anfon y rhain atom, rydych hefyd yn cadarnhau bod unrhyw un sy’n rhan amlwg o’r ffotograff neu fideo yn 18 oed neu’n hŷn, a’u bod wedi rhoi caniatâd i’w delwedd gael ei defnyddio yn y fath fodd.  

5. Atebolrwydd

5.1 Rydych yn derbyn mai eich cyfrifoldeb chi yw unrhyw risgiau sy’n deillio o’ch gweithgaredd codi arian, gan gynnwys atebolrwydd am unrhyw anaf neu golledion a allai ddigwydd i chi, eich cynorthwywyr neu westeion. Byddwch felly’n cymryd pob cam rhesymol i ddiogelu iechyd a diogelwch pawb sy’n cymryd rhan yn eich gweithgaredd, yn ymwneud ag ef neu’n ei fynychu. 

5.2 Byddwch yn cydymffurfio ag unrhyw gyfreithiau a rheoliadau perthnasol sy’n gysylltiedig â’ch gweithgaredd codi arian, gan gynnwys cael unrhyw drwyddedau neu ganiatâd angenrheidiol, e.e. os ydych chi’n cynnal raffl neu loteri, neu’n cynnig gwerthu alcohol. 

5.3 Rydych yn cydnabod ac yn derbyn na fydd polisi yswiriant yr Ymddiriedolaeth Genedlaethol yn cwmpasu eich gweithgareddau codi arian. 

5.4 Ni fyddwch yn gwneud unrhyw beth sy’n fygythiad i enw da’r Ymddiriedolaeth Genedlaethol. Os byddwch chi, mae gan yr Ymddiriedolaeth Genedlaethol yr hawl i atal eich gweithgaredd codi arian ar unwaith.