Darganfyddwch fwy yng Ngerddi Dyffryn
Dysgwch pryd mae Gerddi Dyffryn ar agor, sut i gyrraedd yno, pethau i’w gweld a’u gwneud a mwy.
Ar grwydr gaeafol yng Ngerddi Dyffryn
Ysgrifenwyd gan
Milly Kelly
- Cyhoeddwyd:
- 24 Rhagfyr 2022
Darganfyddwch ryfeddodau gaeafol y gerddi ar y daith hon drwy’r Ardd Goed a’r gardd-ystafelloedd. Fe welwch goed enfawr yn dechrau blaguro, blodau’r gaeaf yn dod â fflach o liw, golygfeydd godidog o’r gerddi, nodweddion pensaernïol y gardd-ystafelloedd, a gardd yn paratoi at y gwanwyn.
Ar grwydr gaeafol
Ar ôl prysurdeb arferol diwedd y flwyddyn a chyda dechrau blwyddyn newydd sbon, mae wâc aeafol yn ffordd wych o ofalu am eich corff a’ch meddwl yn ystod misoedd hir y gaeaf.
Codwch eich taflen ‘Ar Grwydr Gaeafol’ o’r Ganolfan Groeso wrth gyrraedd. Mae’n cynnwys map llawn o’r gerddi ac mae holl ddarnau diddorol yr ardd yn ystod y gaeaf wedi’u nodi er mwyn i chi allu dod o hyd iddyn nhw’n hawdd. Mae’n cynnwys pethau fel lilis bach gwynion, crocysau cynnar, Bocyslwyn y Nadolig a glaswellt addurniadol. Mae’r map hefyd yn nodi lle gwelwch chi ein Tŷ Gwydr, lle cewch fwynhau awyrgylch trofannol hyd yn oed yn nyfnderau’r gaeaf.
Ar gefn y daflen gallwch ddysgu ychydig mwy am waith ein garddwyr dros y gaeaf a beth sydd angen ei wneud i baratoi’r gerddi ar gyfer y gwanwyn.
Bwyd a diod
Pa wâc aeafol fyddai’n gyflawn heb ddiod boeth ar y diwedd? Galwch draw i Gaffi’r Ardd am rywbeth i’ch twymo – mae gennym amrywiaeth o ddiodydd poeth ac oer, bwyd a snacs. Mae gennym ddewis gwych o gacennau hefyd!
Fel arall, dewch â chwpan gyda chi a mwynhewch diod boeth wrth fynd.
Siopa yng Ngerddi Dyffryn
Mae gennym siop hyfryd yma, gyda llawer o nwyddau’r Ymddiriedolaeth Genedlaethol yn ogystal â nwyddau gan gyflenwyr lleol Cymreig. Rydym yn stocio llyfrau, eitemau ffasiwn, nwyddau’r gegin, offer garddio defnyddiol, jamiau, cyffeithiau a marmalêd, trîts siocled a bisgedi, a mwy. Mae gennym adran blanhigion boblogaidd iawn hefyd, felly casglwch rywbeth gaeafol i’w blannu yn eich gardd eich hun.
Mae sêl mis Ionawr ‘mlaen hefyd, felly gallech gael bargen!
