Diwrnodau i’r teulu yn Nhŷ Tredegar
Mae digon i ddiddanu’r teulu i gyd yma yn Nhŷ Tredegar. Gyda phlasty trawiadol a 90 erw o erddi a pharcdir i’w darganfod, rydych chi’n siŵr o greu atgofion i’w trysori am flynyddoedd i ddod.
Trefnu eich ymweliad
Dyma wybodaeth allweddol ar gyfer trefnu ymweliad eich teulu...
- Mae cyfleusterau newid babanod ar gael drws nesaf i’r dderbynfa, ac yng Nghaffi’r Bragdy. Mae tai bach y parc ar agor yn ystod misoedd yr haf yn unig.
- Oherwydd y lloriau hanesyddol, ni allwch ddod â phramiau na bygis i mewn i’r tŷ. Mae lloches parcio pramiau ger drws ffrynt y tŷ.
- Ni chewch ddod â beics, sgwteri, ffrisbis na pheli i mewn i’r gerddi, ond mae digon o le i chwarae gyda’r pethau hyn yn y parc.
- Mae bocsys bwyd plant ar gael yng Nghaffi’r Bragdy, ac mae gan y siop lyfrau ail-law ddewis arbennig o lyfrau plant.
- Rhaid talu i fynd i’r tŷ a’r gerddi, ond gallwch fynd i’r parc am ddim.
Datgelu 500 Mlynedd o'r Nadolig yn Nhŷ Tredegar
Eleni yn Nhŷ Tredegar, bydd hud y Nadolig yn fyw i bawb ei fwynhau.
Oriau agor: Bydd y Tŷ a’r Ardd ar agor o ddydd Gwener i ddydd Llun, 1-4 a 8-11 Rhagfyr, a phob dydd o 11am-4pm rhwng 15 a 23 Rhagfyr. Byddwn ar agor yn hwyr tan 8pm ar rai dyddiau dewisol.
Dadorchuddiwch 500 mlynedd o hanes y Nadolig hwn yn Nhŷ Tredegar, gyda goleuadau godidog, awyrgylch hudolus a thros 80 o goed wedi’u haddurno.
Penwythnos llawen i’r teulu cyfan
Bydd penwythnosau Nadoligaidd i'r teulu ar 9, 10, 16 a 17 Rhagfyr lle bydd yr hen Scrooge bythol boblogaidd yn dychwelyd i fwrw ei lygad barcud ar ddathliadau'r Nadolig, ond bydd digon o ganu a chanu côr i gadw'r ysbryd Nadoligaidd yn fyw a Siôn Corn crwydrol yn lledaenu llawenydd i bawb.
Trefnwch eich ymweliad ar gyfer y Nadolig yma.
Pethau i’w gwneud yn y tŷ
Gwisgo i greu argraff
Esguswch mai Tŷ Tredegar yw eich cartref neu weithle chi gyda dewis o wisgoedd traddodiadol. Gyda ffrogiau, siacedi a hetiau i ddewis o’u plith – ydych chi am fod yn arglwyddes neu’n fwtler? A chofiwch dynnu llun fel teulu yn yr Ystafell Frown.
Chwarae gyda phypedau
Ewch i’r Lolfa lle gwelwch gornel glud ag arddangosfa bypedau ryngweithiol. Crëwch eich storïau eich hun am y bobl a oedd yn byw yma gyda’ch teulu a’ch ffrindiau. Allwch chi ail-greu rhai o’r straeon rydych chi wedi’u clywed yn ystod eich ymweliad?
Pecynnau Synhwyrau
Mae ein pecynnau synhwyrau lliwgar ar gael i unrhyw un eu benthyg ac wedi’u dylunio i deuluoedd sydd ag anghenion cymorth ychwanegol. Maen nhw’n cynnwys amrywiaeth o eitemau synhwyraidd, gan gynnwys teganau llonyddu, gwarchodwyr clustiau, chwyddwydr, llyfr stori a theganau meddal.
Mae pecynnau synhwyrau’n ychwanegiad newydd i Dŷ Tredegar ac mae ein tîm wedi eu datblygu’n ofalus, gan ddilyn canllawiau gan sawl sefydliad sy’n gweithio yn y maes. Byddem wrth ein bodd yn clywed eich adborth fel y gallwn ddal ati i wella’r pecynnau dros amser. Mae croeso i chi sgwrsio â’n tîm os oes gennych unrhyw sylwadau neu awgrymiadau i’w rhannu gyda ni.
Pethau i’w gwneud yn y gerddi
Pecynnau Antur
Mae cymaint i’w ddarganfod yn y gerddi ffurfiol, o’r bywyd newydd sy’n tyfu yn y gwelyau blodau i’r pryfed sy’n palu mewn tywydd gwlyb. Nod y pecynnau hyn yw helpu anturiaethwyr ifanc i gael golwg fanylach ar fyd natur, ac maent yn cynnwys offer i'w ddefnyddio o gwmpas y gerddi ar eich anturiaethau.
Mae pecynnau antur yn cynnwys pâr o finocwlars, cwmpawd, chwyddwydr, offer astudio pryfed a llyfr ‘adnabod’ tymhorol. Mae ‘na hefyd lyfr stori i’w ddarllen pan benderfynwch chi gael hoe fach o’r holl waith darganfod.
50 peth i'w wneud cyn dy fod yn 11 ¾
Mwynhewch weithgareddau’r 50 peth i’w wneud cyn dy fod yn 11 ¾ – rhestr fwced yr Ymddiriedolaeth Genedlaethol i anturiaethwyr ifanc. Gwyliwch aderyn, gwnewch ffrindiau gyda phryfyn neu ewch i grwydro yn eich welîs wrth i chi fwynhau popeth sydd gan y gerddi i’w gynnig. Casglwch daflen weithgareddau o’r dderbynfa ymwelwyr cyn i chi ddechrau ar eich antur wyllt.
Pethau i’w gwneud yn y parc
Lle i chwarae a mwynhau picnic
Gydag ardaloedd gwyrdd eang, y parc yw’r lle perffaith i gicio pêl, reidio beic neu fwynhau natur gyda phicnic a thaith gerdded. Mewn tywydd gwlyb, gall rhai o’r llwybrau fod yn fwdlyd, felly cofiwch wisgo’n addas ar gyfer eich ymweliad.
Bwydo’r hwyaid
Mae’r llyn addurniadol yn Nhŷ Tredegar yn gartref i lawer o wahanol adar, gan gynnwys hwyaid, cotieir, elyrch a gwyddau. Pys wedi rhewi yw’r bwyd gorau sydd gennych i adar yn eich cartref, mae’n siŵr – maen nhw’n llawn maetholion iach.
Llwybr y llyn
Bydd y gylchdaith fer hon yn eich tywys o amgylch perimedr y parc yn Nhŷ Tredegar. Mae’r llwybr gwastad, sy’n filltir o hyd, yn ddihangfa heddychlon o’r ddinas i’r teulu i gyd.