Diwrnodau allan i'r teulu yng Nghastell Powis

Hanner Tymor Hydref - Calan Gaeaf 

Yn ystod hanner tymor mis Hydref, dewch â’r teulu cyfan i ymuno â ni i ddathlu Calan Gaeaf gyda rhaglen o ddigwyddiadau hwyliog i’r teulu wedi’u hysbrydoli gan draddodiadau a chwedlau Cymru – gydag ychydig o ysbryd brawychus a bwganllyd y tymor.

Wrth i liwiau’r hydref ledaenu dros yr Ardd, mae’r llwybr pwmpen poblogaidd yn ei ôl gyda thro chwedlonol. Dilynwch y pwmpenni drwy’r ardd i chwilio am greadur Cymreig chwedlonol a dysgu am chwedl yr Hwch Ddu Gwta ar hyd y ffordd.

Cewch gadw golwg am dretiau lliwgar, wedi’u cuddio’n gynnil mewn mannau annisgwyl, mwynhau sesiwn adrodd stori iasoer sy’n addas i’r teulu a bod yn greadigol wrth greu masg sydd wedi’i ysbrydoli gan yr hydref. 

Gyda llwybrau, crefftau a straeon tymhorol yn aros i gael eu darganfod, dyma’r lle perffaith i fwynhau’r hydref a chreu atgofion bythgofiadwy gyda’r teulu.

Pa bynnag oed ydych chi, dewch yn eich gwisg ffansi fwyaf trawiadol! 

Digwyddiadau’r hydref hwn  

Tarwch olwg ar y rhestr ddigwyddiadau cyn ymweld, i gael y diwrnod gorau posib yng Nghastell a Gardd Powis. 

Beth yw Calan Gaeaf? 

Mae ‘Calan’ yn golygu diwrnod cyntaf y mis. Felly, mae Calan Gaeaf yn nodi dechrau’r gaeaf ar 1 Tachwedd. Mae’n draddodiad sydd wedi’i wreiddio’n ddwfn yn niwylliant Cymru, gan adlewyrchu ein llên gwerin, troad y tymhorau a’n treftadaeth gyfoethog. 

Ar Nos Galan Gaeaf, byddai cymunedau’n dod ynghyd i ymgynnull, cynnau coelcerthi ac yn dilyn hen arferion amddiffynnol a oedd, yn ôl y sôn, yn gwarchod rhag ysbrydion crwydrol a direidus. 

Heddiw, mae Calan Gaeaf yn cael ei ddathlu fel gŵyl hydref draddodiadol Gymreig sy’n nodi dechrau hanner tywyllaf y flwyddyn. Yn ôl y traddodiad, dyma’r adeg pan oedd y ffin rhwng byd y byw a byd yr ysbrydion yn teneuo.

Mwynhau’r ardd gyda’ch ci  

Edrychwch ar y wybodaeth cyfeillgar i gŵn cyn i chi gychwyn, gan gynnwys ble mae cŵn yn cael mynd a beth i’w ddisgwyl yn ystod eich ymweliad.  

Hwyl ‘gwefreiddiol’ y tu mewn i’r castell

Eleni rydym am gael hwyl ‘Gwefreiddiol’ wrth i ni ddathlu dechrau ein prosiect mawr i uwchraddio’r gwifrau o fewn y castell hwn o’r 13eg ganrif.

Wrth i chi grwydro’r Ystafelloedd Swyddogol addurnedig, darganfyddwch sut mae'r castell canoloesol hwn wedi'i foderneiddio'n ofalus dros y canrifoedd, a chamwch i rôl trydanwr castell wrth i chi gwblhau gweithgareddau a heriau ar hyd y ffordd.

Peidiwch â methu'r llygod ffelt selog yn eu siacedi llachar sydd wedi'u cuddio ar hyd y castell - fe welwch chi nhw'n trwsio gwifrau, yn cario offer, ac yn gweithio'n galed yn y lleoedd mwyaf annisgwyl. Faint ohonyn nhw allwch chi ddod o hyd iddynt?

Mae’n sicr o ddifyrru’r teulu oll wrth i chi ddysgu mwy am sut rydym yn gofalu am y castell canoloesol mawreddog hwn yn awr ac ar gyfer y dyfodol.

Mae'r llwybr yn rhad ac am ddim, ond mae prisiau mynediad arferol yn berthnasol. Am ddim i aelodau’r Ymddiriedolaeth Genedlaethol.

 

Hwyl i’r teulu oll yn yr ardd

Camwch y tu allan a darganfod mwy fyth o anturiaethau’n disgwyl amdanoch yn yr ardd enwog. Gyda choedlan ffurfiol, corneli cudd, a digon o le i grwydro, dyma’r lle delfrydol ar gyfer teuluoedd sydd eisiau crwydro gyda’i gilydd.

Ewch am dro ar y 'Llwybr Poced' a gweld pa drysorau y gallwch ddod o hyd iddynt i lenwi'ch pocedi - deilen ddiddorol, carreg lefn, neu betal sydd wedi cwympo - beth wnewch chi ddod o hyd iddo? Mae digon o heriau hwyliog ar hyd y ffordd hefyd. Cadw llygad am gerfluniau, chwarae cuddio, croesi’r cerrig camu, rasio ar hyd y llwybr hiraf, a dod o hyd i'r goeden fwyaf - perffaith ar gyfer cofleidiad mawr. 

P’un a ydych yn rhedeg, crwydro, neu’n dianc i mewn i fyd natur, mae’r ardd y lle perffaith i greu atgofion gyda’ch gilydd.

Mae'r llwybr yn rhad ac am ddim, ond mae prisiau mynediad arferol yn berthnasol. Am ddim i aelodau’r Ymddiriedolaeth Genedlaethol.

Darganfyddwch ddreigiau

Ewch y tu hwnt i'r ardd ac i mewn i'r Gwyllt, y goedlan ffurfiol, lle mae dwy ddraig fach wedi gwneud nyth. Mae’r creaduriaid chwedlonol hyn yn llawn cymeriad ac yn barod i danio’ch dychymyg.

Neidiwch i’r cyfrwy ar eu cefnau a gadael i’ch dychymyg fynd â chi ar antur hudolus. A fyddant yn mynd â chi dros fynyddoedd uchel, drwy’r cymylau, neu i mewn i'ch antur unigryw chi?

Wedi'u creu gan yr artist lleol enwog Simon O'Rourke, bydd y cerfluniau rhyfeddol hyn yn eich cludo chi a'ch anturwyr bach i fyd o chwedlau, hud, adrodd straeon a chwarae.

Cynllunio eich ymweliad teuluol

Dyma’r wybodaeth y bydd arnoch ei hangen yn gryno i’ch helpu i gynllunio eich diwrnod yng Nghastell Powis: 

• Cyfleusterau newid babanod ar gael ger Mynedfa’r Ardd ac yn yr Ardd Ffurfiol. 
• Oherwydd y nifer o risiau a’r tu mewn hanesyddol, ni chaniateir cadeiriau gwthio yn y castell. Mae croeso i chi adael cadeiriau gwthio yng nghyntedd allanfa’r castell. 
• Ni chaniateir beiciau na sgwteri yn yr ardd am resymau iechyd a diogelwch.
• Nodwch: ni chaniatäer ffotograffiaeth yn y castell.