Gweithgareddau yn yr awyr agored yn Erddig

Grŵp o bedwar plentyn yn rhedeg ar draws lawnt wedi ei thorri tuag at y camera. Maent wedi eu hamgylchynu gan wrychoedd ffurfiol, gyda thŷ brics coch yn y cefndir. — Plant yn rhedeg trwy’r ardd yn Erddig | © National Trust Images/Arnhel de Serra

Gyda gardd ffurfiol a 1,200 erw o barcdir wedi ei dirlunio i’w mwynhau, mae gan Erddig ddigonedd o ddewisiadau i chi fynd allan ac ymgolli yn natur. Rhowch gynnig ar ein gweithgareddau grŵp cyfeillgar, am ddim, gan gynnwys cerdded Nordig a parkrun, neu chwiliwch am lwybr i’w gerdded ar eich cyflymder eich hun.

Gweithgareddau awyr agored am ddim

Gall mynd i’r awyr agored yn Erddig fod yn ffordd wych o gael gwared ar straen a gwella eich llesiant. A does dim rhaid i chi fod yn chwys i gyd i gael budd.

‘It’s not just about taking exercise. Just relaxing and enjoying gardens and the countryside is better than sitting in front of the television or computer.’

– Glyn Smith, Prif Arddwr Erddig

Mae ein holl weithgareddau am ddim. Mae bwced rhoddion ar gyfer y cerdded Nordig a sesiynau Esgidiau Rhedeg Mwdlyd i helpu i brynu offer newydd, ond nid oes gofyn i chi gyfrannu.

Mae’r bwyty yn Erddig ar agor ar ôl ein holl weithgareddau bore sydd wedi eu trefnu, felly gallwch sbwylio eich hun a dod i adnabod ffrindiau newydd.

Cerdded yn Erddig

Os ydych yn chwilio am daith gerdded fer heibio’r Gwpan a’r Soser, nodwedd dŵr o’r 18fed ganrif, neu daith bellach trwy’r coetir a’r gweirgloddiau, mae llwybr addas i bawb yng ngardd ffurfiol Erddig a’r parcdir wedi ei dirlunio.

Ar gyfer pobl sy’n ei chael yn anos symud, mae llwybr heb risiau o gwmpas yr ardd ac mae rhai llwybrau parcdir yn addas i gadeiriau olwyn hefyd.

Tair merch mewn cae glaswelltog yn camu ymlaen i bwyso ar eu polion cerdded, sydd ganddynt ym mhob llaw. — Dysgwch dechnegau syml cerdded Nordig | © National Trust Images/Arnhel de Serra

Cerdded Nordig

Cerdded Nordig yw’r ymarfer i’r corff cyfan gorau i bobl o bob lefel o ffitrwydd. Yn ddiogel a chymdeithasol, mae’n eich helpu i gryfhau cyhyrau heb roi fawr o straen ar gymalau, a gallai helpu i leddfu problemau gwar, ysgwydd a chefn.

Ymunwch â’n harweinwyr teithiau cerdded gwirfoddol ar gyfer y sesiynau iachusol yma ar ddyddiau Mercher a Sadwrn. Croesawir pob gallu – rydym yn darparu polion cerdded Nordig, neu gallwch ddod â rhai eich hun.

Rhedeg yn Erddig

Parkrun Erddig

Wedi ei drefnu a’i arwain gan dîm ymroddedig o wirfoddolwyr, mae parkrun Erddig yn ffordd wych o gychwyn y penwythnos ac edmygu cyffiniau’r ystâd.

Mae Parkrun yn ddigwyddiadau wythnosol, cymunedol 5k am ddim. Fe’u cynhelir bob bore Sadwrn am 9am mewn parciau a mannau agored o gwmpas y byd. Mae’n brofiad cadarnhaol, croesawus a chynhwysol heb unrhyw gyfyngiad amser ac ni fydd unrhyw un yn gorffen yn olaf. Mae croeso i bawb ddod draw, os byddwch yn cerdded, jogio, rhedeg, gwirfoddoli neu wylio.

Tu allan i’r tŷ y mae’r daith yn cychwyn a gorffen, ac mae’n cynnwys ‘allt Erddig’ sydd newydd ei enwi i herio eich hun ar y ffordd. Croesewir cŵn ar dennyn byr ar ein parkrun.

Os nad ydych yn teimlo fel gwneud y 5k, mae croeso i chi ymuno â ni fel stiward gwirfoddol.

Ewch i’r dudalen we parkrun Erddig

Mam a’i phlant yn plygu ger gwrych wedi ei docio a thiwlipau yn yr ardd o flaen y tŷ yn Erddig, Clwyd. — Ymwelwyr yn yr ardd yn Erddig | © National Trust Images/John Millar

Grŵp rhedeg i ddechreuwyr

Grŵp rhedeg i ddechreuwyr sy’n cael ei gynnal ddwywaith yr wythnos yw Esgidiau Rhedeg Mwdlyd Erddig sy’n cyfarfod bob bore Sadwrn ac ar nos Fercher. Mae’r grŵp yn gefnogol a chroesawus iawn, yn addas i bob gallu, gan gynnwys dechreuwyr llwyr.