Casgliadau Tŷ a Gardd Plas Newydd
Darganfyddwch yr eitemau a’r gwaith celf rydym yn gofalu amdanynt yn Nhŷ a Gardd Plas Newydd ar wefan Casgliadau’r Ymddiriedolaeth Genedlaethol.
Arddangosfeydd ym Mhlas Newydd
Mae Synwyriwm yn brosiect celfyddydau ac iechyd cydweithredol a ddatblygwyd gan Amser i Siarad a Galeri Caernarfon gyda Phlas Newydd, gan ddefnyddio creadigrwydd i gefnogi iechyd meddwl ac annog cysylltiad ystyrlon.
‘Synwyriwm’; arddangosfa celfyddydau creadigol a llesiant ym Mhlas Newydd
Wedi’i ddatblygu gan Amser i Siarad a Galeri Caernarfon, mewn cydweithrediad â Plas Newydd, prosiect cydweithredol y celfyddydau ac iechyd yw ‘Synwyriwm’. Mae’r prosiect yn dod â llesiant a chreadigrwydd ynghyd, gan ddefnyddio'r celfyddydau i gefnogi iechyd meddwl ac annog cysylltiad ystyrlon. Yn dilyn haf llwyddiannus yn y Galeri Caernarfon, bydd yr arddangosfa ar gael i'w gweld yn yr Ystafell Gerdd ym Mhlas Newydd o ddydd Sadwrn, 13 Medi tan ddydd Sul, 2 Tachwedd 2025.
Beth i'w ddisgwyl
Mae’r arddangosfa synhwyraidd hon yn dod â gwaith wedi’i gomisiynu gan bump artist sy’n siarad Cymraeg ynghyd, ochr yn ochr â darnau creadigol a ddatblygwyd yn ystod cyfres o weithdai â chleientiaid o Amser i Siarad. Mae Synwyriwm yn fan i fyfyrio, rhannu a dathlu’r rhan y gall creadigrwydd ei chwarae o ran cefnogi iechyd meddwl pobl.
Nid oes unrhyw gost ychwanegol i weld yr arddangosfa, mae costau mynediad arferol i Blas Newydd yn daladwy. Nid oes angen archebu ymlaen llaw, fodd bynnag, os ydych yn bwriadu ymweld fel grŵp mawr, gofynnwn ichi gysylltu â plasnewydd@nationaltrust.org.uk ymlaen llaw i’n helpu ni i gynllunio eich ymweliad.
Beth sydd angen ichi ei wybod:
-
Dyddiadau: 13 Medi - 2 Tachwedd 2025
-
Lleoliad: Yr Ystafell Gerdd, Tŷ Plas Newydd
-
Oriau agor y tŷ: 10am-4pm bob dydd (mynediad olaf am 3:30pm)
-
Yn gynwysedig gyda mynediad arferol
Arddangosfa Synwyriwm
Gwaith celf o arddangosfa Synwyriwm
1 of 4
Ariannwyd yr arddangosfa hon gan Gyngor Celfyddydau Cymru, grant Iechyd a Llesiant y Celfyddydau, gyda chefnogaeth Llywodraeth Cymru, Y Loteri Genedlaethol a Phlas Newydd.
Cwrdd â’r cydweithredwyr
Mae Amser i Siarad yn elusen iechyd meddwl sy’n cefnogi oedolion a phlant a phobl ifanc ledled Ynys Môn a Gwynedd. Wedi’u lleoli yng Nghaernarfon, maent yn darparu gwybodaeth a gwasanaethau sy'n canolbwyntio ar iechyd meddwl a llesiant.
Mae Galeri Caernarfon yn ganolfan celfyddydau cymunedol nid er elw sy’n cynnig theatr, sinema, unedau gwaith a gofodau arddangos. Mae eu gweledigaeth, “Creu Cyfoeth Cymunedol Cynaliadwy” (Creating Sustainable Community Wealth), yn cael ei hadlewyrchu yn y rhaglennu artistig amrywiol, gan gynnwys theatr, ffilm, arddangosfeydd, cerddoriaeth a gweithdai.
Cwrdd â'r artistiaid
Comisiynwyd pump o artistiaid sy’n siarad Cymraeg i gynhyrchu amrywiaeth o waith celf synhwyraidd a ysbrydolwyd gan dreftadaeth Plas Newydd. Yna siapiodd y darnau hyn gyfres o weithdai gyda chleientiaid Amser i Siarad, lle daeth creadigrwydd yn ffordd o archwilio ffurfiau celf newydd, sbarduno sgyrsiau a chefnogi llesiant.
Daeth bob artist â dull unigryw:
-
Arweiniodd Ticky Lowe weithdai gan ddefnyddio ffabrigau a chynwysyddion wedi’u huwchgylchu i archwilio’r syniad o roi bywyd newydd i wrthrychau sydd wedi mynd yn angof.
-
Cyflwynodd Sarah Zybroska gyfranogwyr i adrodd straeon drwy ffilm a cherddoriaeth, gan annog hunan-fynegiant drwy sain a delwedd.
-
Canolbwyntiodd Ffion Pritchard ar lyfrau plyg rhyngweithiol, gan ddefnyddio cyffyrddiad, gwead a symudiad i archwilio adrodd straeon yn synhwyraidd.
-
Gwahoddodd Glyn Price y cyfranogwyr i gysylltu â natur drwy baentio a gweithgareddau synhwyraidd yn yr ardd ym Mhlas Newydd.
-
Gweithiodd Ella Louise Jones yn yr awyr agored gydag eco-argraffu a lliwio naturiol, gan archwilio creadigrwydd drwy liw, arogl a natur.
Bydd yr arddangosfa ‘Synwyriwm’ ym Mhlas Newydd tan 2 Tachwedd 2025. Mae’r Tŷ ar agor bob dydd o 10am tan 4pm.