Diwrnodau allan i’r teulu ym Mhlas Newydd

Diwrnod allan perffaith i'r teulu

Mae ardal chwarae naturiol Plas Newydd yng Nghoed y Llaethdy yn gyrchfan berffaith i deuluoedd sy’n awyddus i fwynhau’r awyr agored. Yma, gall plant brofi eu sgiliau ar amrywiaeth o rwystrau, gan ei wneud yn fan delfrydol ar gyfer ras gyfeillgar i weld pwy all gwblhau'r cwrs gyflymaf!

Gwnewch yn siŵr eich bod chi'n archwilio'r tŷ coeden - dringwch i'r brig a mwynhau'r golygfeydd o'r lle uchel hwn. Mae'n lle gwych i blant adael i'w dychymyg esgyn wrth fwynhau'r olygfa. I'r rhai sydd â rhediad cystadleuol, mae ein cwrs golff ffrisbi yn aros. Dewch â ffrisbi gyda chi a heriwch eich teulu a'ch ffrindiau i'r gêm unigryw a chyffrous hon.

P’un a ydych chi yma i chwarae, ymlacio, neu’n mwynhau byd natur, mae’r ardal chwarae ym Mhlas Newydd yn cynnig rhywbeth arbennig i bawb.

'The Big Draw' ym Mhlas Newydd

24 Hydref - 1 Tachwedd

Mae Plas Newydd yn cynnal digwyddiad 'The Big Draw' hanner tymor yr hydref rhwng 24 Hydref a 1 Tachwedd. 

Ymwelodd yr artist Rex Whistler â Phlas Newydd sawl gwaith rhwng 1938 a 1940. Cafodd ei gomisiynu gan y chweched Ardalydd ac Ardalyddes i greu murlun ar gyfer yr ystafell fwyta newydd hir, a chael ei ysbrydoli gan ei amgylchedd i baentio a braslunio yn ystod ei ymweliadau â’r Plas.

Heddiw gallwch chi gael eich ysbrydoli gan baentiadau a darluniau Rex Whistler yn y casgliad ym Mlas Newydd. Mae offer darlunio yn y tŷ i chi fynd ati i greu eich campwaith eich hun. Ewch amdani a chael eich ysbrydoli gan furlun enwog Whistler yn yr ystafell fwyta. Beth am roi cynnig arni gyda’r pasteli, y pensiliau a’r îsls sydd ar gael yn y Pafiliwn Criced? Edrychwch ar yr olygfa fel y gwnaeth Whistler ei hun a chael eich ysbrydoli gan yr hyn a welwch. Eisteddwch am ychydig a chreu eich campwaith eich hun.

Mae 'The Big Draw' yn ŵyl fyd-eang sy’n dathlu celf a phwysigrwydd creadigrwydd. Thema 2026 yw Gwneud Marciau. Mae’r Ymddiriedolaeth Genedlaethol yn bartner swyddogol i Wŷl Big Draw.

Cynllunio eich ymweliad

Dyma wybodaeth ddefnyddiol a all eich helpu i gynllunio eich diwrnod allan nesaf ym Mhlas Newydd:

• Ceir toiledau a chyfleusterau newid babanod yn yr Hen Laethdy ac wrth fynedfa’r Tŷ.
• Caniateir cadeiriau gwthio ar lawr gwaelod y Tŷ. Ar adegau prysur, efallai y gofynnir ichi eu gadael wrth y fynedfa.
• Mae bocsys bwyd a bwydlenni i blant ar gael yng nghaffi’r Hen Laethdy, yn cynnwys prydau poeth, brechdanau, hufen iâ a theisennau.

Bagiau synhwyraidd

Mae 2 bag synhwyraidd ac amddiffynwyr clust ar gael i'w benthyca i'w llofnodi i mewn ac allan yn Nerbynfa'r Ymwelwyr. Maent i helpu ymwelwyr ag awstistiaeth, anhwylder prosesu synhwyraidd, neu'r rhai sy'n meddwl byddent yn elwa ohonynt, yn ystod ymweliad â Phlas Newydd.

Pethau y dylech eu gwybod cyn dod draw

• Codir prisiau mynediad arferol.
• Mae’r daith yn addas i gadeiriau olwyn a chadeiriau gwthio, ond efallai y byddwch yn dod ar draws mannau mwdlyd ar hyd y ffordd.
• Caniateir cŵn ar dennyn byr yn y gerddi, ac eithrio’r Terasau.