Un o arddangosfeydd ffotograffiaeth gerddi a phlanhigion gorau'r byd yn cyrraedd Gardd Bodnant

Bydd ymwelwyr â'r ardd yr hydref hwn yn gallu mwynhau detholiad syfrdanol o ffotograffau o ansawdd uchel, ar raddfa fawr sy'n dal harddwch amrywiaeth eang o erddi, tirweddau, fflora, ffawna a ffyngau o bob cwr o'r byd.

Hon fydd arddangosfa gyntaf y gystadleuaeth i gael ei harddangos yng Ngogledd Cymru, ynghyd â fformat a chynnwys dwyieithog. Mae'r arddangosfa'n tynnu sylw at harddwch gerddi a gipiwyd trwy lens ffotograffwyr proffesiynol ac amatur fel ei gilydd, gan gynnig ysbrydoliaeth i arddwyr a selogion ffotograffiaeth.

Fel rhan o'r arddangosfa, bydd cystadleuaeth arbennig, o'r enw ‘Bywyd yng Ngardd Bodnant’, hefyd ar ddangos yn cynnwys detholiad o ffotograffau arobryn o’r flwyddyn gyntaf un o’i chynnal, pob un wedi'i gipio yn yr ardd ym Modnant.

Ymhlith y delweddau buddugol a dynnwyd o Ardd Bodnant ar gyfer y Wobr Arbennig mae un sydd wedi derbyn Canmoliaeth Uchel; ffotograff o rododendron pinc bywiog 'Vanessa', a dynnwyd tra roedd yn llawn blodau. Gyda phetalau syrthiedig yn rhaeadru i lawr y grisiau isod, mae'n denu’r gwyliwr i mewn i feddwl ble gallai'r grisiau eu harwain. Cafodd y ddelwedd hon ei chipio gan un o wirfoddolwyr talentog iawn Gardd Bodnant ei hun, David M. Metcalfe.

Meddai Hamza Mould, Rheolwr Cyffredinol Gardd Bodnant ‘Rydym yn wirioneddol gyffrous i allu cynnal yr arddangosfa yma yn yr ardd. Bob blwyddyn, mae Gardd Bodnant yn croesawu dros 280,000 o ymwelwyr o bob cwr o'r byd, a gobeithiwn y bydd y digwyddiad awyr agored hwn yn darparu rhywbeth gwahanol i ymwelwyr newydd ac ymwelwyr sy'n dychwelyd i'r ardd.’

Dywedodd James McGlinchey, Rheolwr Arddangosfeydd yn IGPOTY: ‘Rydym hefyd wrth ein bodd i fod yn arddangos gyda'n harddangosfa awyr agored yng Ngogledd Cymru wedi'i chyflwyno yn y Gymraeg a'r Saesneg am y tro cyntaf yng Ngardd Bodnant, rydym yn mawr obeithio y bydd ymwelwyr sy'n dychwelyd a rhai newydd yn cael eu hysbrydoli gan y delweddau hardd sydd ar ddangos.’

Mae Gardd Bodnant wedi bod yn ysbrydoliaeth i artistiaid a ffotograffwyr yn lleol ac yn rhyngwladol ers cenedlaethau ac mae'n un o'r gerddi mwyaf poblogaidd ar gyfer ffotograffiaeth ar y blaned. Wedi'i henwi fel un o'r 10 gardd mwyaf ffotograffig yn y byd, dim ond llefydd fel Gardd Monet yn Ffrainc a Jardin Majorelle ym Marrakech sy'n ei guro.

Drwy gydol yr hydref, bydd cyfres o ddigwyddiadau unigryw ar gael hefyd. O deithiau gyda'r Prif Arddwr, sesiynau ffotograffiaeth codiad haul a gweithdai gwneud printiau a phasteli, mae rhywbeth i bawb.

Beth am ymuno â'r artist lleol Paul Pigram ar 14 Hydref i greu eich paentiad pastel eich hun wedi'i ysbrydoli gan yr ardd o dan hyfforddiant arbenigol Paul? Neu os mai ffotograffiaeth yw eich pleser, ymunwch â'r ffotograffydd proffesiynol Paul Harris ar daith gerdded dywys o amgylch gardd yr hydref ar 16 Hydref a chasglu rhai o'i awgrymiadau gorau ar gyfer ffotograffiaeth natur gyda chinio gyda'n gilydd i ddilyn yng Nghaffi'r Pafiliwn.