Diwrnodau allan i'r teulu yng Ngardd Bodnant

Gardd Bodnant yw’r lle perffaith i ddod â’r teulu at ei gilydd yn ystod yr hydref. Gyda theithiau cerdded coetir a dail hydrefol tanllyd hardd sy'n dod â'r dirwedd yn fyw, mae digon i'w fwynhau i bob oed.

Hanner Tymor Hydref - Calan Gaeaf 

24 Hydref - 8 Tachwedd

Yn ystod hanner tymor mis Hydref, dewch â’r teulu cyfan i ymuno â ni i ddathlu Calan Gaeaf gyda rhaglen o ddigwyddiadau hwyliog i’r teulu wedi’u hysbrydoli gan draddodiadau a chwedlau Cymru – gydag ychydig o ysbryd brawychus a bwganllyd y tymor.

Mentrwch allan ar helfa bwystfilod yr hanner tymor Hydref hwn a chamwch i’r Ardd wrth i’r ffin rhwng dau fyd ddiflannu, ac wrth i straeon am fwystfilod chwedlonol a chreaduriaid lledrithiol ddod yn fyw. 

Cewch ddilyn llwybr sy’n addas i’r teulu, datrys posau, chwarae gemau, creu cerddoriaeth a mynd i’r afael â heriau hwyliog er mwyn helpu i gadw’r creaduriaid yn fodlon wrth i chi grwydro. 

Mae bod yng nghanol prydferthwch  lliwiau’r hydref yn ffordd wych o fwynhau’r tymor gyda’ch gilydd a sbarduno’r dychymyg ifanc. 

A fyddwch chi’n llwyddo i fynd drwy’r Ardd yn ddiogel a dianc rhag yr Hwch Ddu Gwta cyn iddi ddal y teithiwr olaf adref?

Pa bynnag oed ydych chi, dewch yn eich gwisg ffansi fwyaf trawiadol! 

Digwyddiadau’r hydref hwn  

Tarwch olwg ar y rhestr ddigwyddiadau cyn ymweld, i gael y diwrnod gorau posib.

Beth yw Calan Gaeaf? 

Mae ‘Calan’ yn golygu diwrnod cyntaf y mis. Felly, mae Calan Gaeaf yn nodi dechrau’r gaeaf ar 1 Tachwedd. Mae’n draddodiad sydd wedi’i wreiddio’n ddwfn yn niwylliant Cymru, gan adlewyrchu ein llên gwerin, troad y tymhorau a’n treftadaeth gyfoethog. 

Ar Nos Galan Gaeaf, byddai cymunedau’n dod ynghyd i ymgynnull, cynnau coelcerthi ac yn dilyn hen arferion amddiffynnol a oedd, yn ôl y sôn, yn gwarchod rhag ysbrydion crwydrol a direidus. 

Heddiw, mae Calan Gaeaf yn cael ei ddathlu fel gŵyl hydref draddodiadol Gymreig sy’n nodi dechrau hanner tywyllaf y flwyddyn. Yn ôl y traddodiad, dyma’r adeg pan oedd y ffin rhwng byd y byw a byd yr ysbrydion yn teneuo. 

Ewch i weld y dail

P'un a ydych chi'n treulio diwrnod cyfan neu awr neu ddwy, mae gweld y coed masarn yn newid i'w lliwiau hydrefol yn uchafbwynt tymhorol o fis Medi i fis Tachwedd. Ewch drwy'r Hen Barc a thuag at Ddôl y Masarn. Cadwch lygad allan ar hyd y llwybr i'r dde ac yn fuan fe welwch chi goch tanllyd ac ambr y masarn. 

Y Ddrysfa Helyg a'r Glyn

Os ydych chi'n teimlo ychydig yn fwy egnïol, ewch i'r Pen Pellaf a dewch o hyd i'r Ddrysfa Helyg fyw. Mae meinciau picnic gerllaw, felly beth am bacio fflasg o siocled poeth a phecyn bwyd i’w fwynhau yno? Gallech hefyd gerdded yn ôl i Giosg y Glyn a mwynhau rhywbeth cynnes wrth eistedd wrth ymyl yr Hen Felin sy'n edrych ar Fôr y Canoldir.

Ewch yn ôl i fyny tuag at yr Ardd Deras Eidalaidd ffurfiol i gael llun teuluol ac eiliad dawel o flaen y Felin Pinnau.
 

Cynllunio eich ymweliad 

• Mae toiledau a chyfleusterau newid babanod wedi’u lleoli drws nesaf i’r maes parcio, tu ôl i ystafell de’r Pafiliwn ac i lawr ger y Ciosg yn y Glyn.    
• Mae rhai ardaloedd yn yr ardd yn serth ac mae grisiau ar nifer o’r llwybrau. Os byddwch yn defnyddio bygi neu bram yn ystod eich ymweliad, gofynnwch i aelod o’r tîm yn yr Adeilad Croesawu Ymwelwyr pan fyddwch yn cyrraedd am fap sy’n nodi’n glir y llwybrau sydd heb risiau.   
• Mae bocsys cinio i blant ar gael o gaffi’r Pafiliwn a Magnolia.