Diwrnodau allan i'r teulu yng Erddig

Cynllunio eich ymweliad ar gyfer y teulu

Cymerwch gip ar y wybodaeth yma i’ch help i gynllunio eich ymweliad nesaf ag Erddig:

• Mae toiledau a chyfleusterau newid babanod wedi’u lleoli yn Iard y Domen. Mae toiledau compostio ychwanegol wedi’u lleoli yn Ffau’r Blaidd, ein hardal chwarae naturiol.

• Caiff pramiau eu caniatáu ledled llawr gwaelod y tŷ yn unig, sy’n gwbl hygyrch, gyda lloriau carreg gwastad. Gallwch hefyd adael pramiau wrth fynedfa’r tŷ.

• Sylwer – ni chaniateir cŵn y tu mewn i’r tŷ, yn yr ardd, yn y siop, ym mwyty’r Daflod nac yn Ffau’r Blaidd, sef ardal chwarae naturiol. Yr unig eithriad i’r polisi hwn yw cŵn cymorth cofrestredig.

Calan Gaeaf yn Erddig

17 Hydref - 1 Tachwedd 2026

Hanner tymor fis Hydref eleni, ymunwch â ni yn Erddig i ganfod y traddodiadau, straeon a llên gwerin Calan Gaeaf.

Yn nodi diwedd y cynhaeaf a dechrau’r misoedd tywyllach, mae Calan Gaeaf, ers amser maith, wedi’i gysylltu â straeon am ysbrydion, creaduriaid od a thymhorau newidiol Cymru.

Cewch ddilyn llwybrau, sy’n addas i’r teulu cyfan, drwy’r tŷ a’r ardd, wedi’u hysbrydoli gan lên gwerin Cymru a chwedlau lleol. Ar eich taith, cewch fod yn greadigol gyda chrefftau tymhorol, ymgasglu o amgylch y tân agored i dostio malws melys a mwynhau ystod o weithgareddau hydrefol. Bydd mwy i’w ganfod adeg Calan Gaeaf, gan gynnwys cerfio pwmpen, peintio wynebau a digon o hwyl ymarferol.

Gyda thŷ hanesyddol, gerddi a thirwedd hydrefol liwgar Erddig fel cefndir, mae’n gyfle i chi a’ch plant archwilio traddodiadau Cymru gyda’ch gilydd a chanfod rhai o’r straeon a llên gwerin a gysylltir â’r adeg arbennig hon o’r flwyddyn.

Ffau’r Blaidd

Ni fyddai unrhyw ymweliad teuluol ag Erddig yn gyflawn heb ymweld â Ffau’r Blaidd. Wedi’i hadeiladu gan ddefnyddio adnoddau o’r ystâd yn bennaf, mae’r ardal chwarae naturiol hon yn ymestyn dros bron i ddwy erw o dir chwarae gwyllt. Cewch hedfan yn uchel ar y siglen raff, profi’ch cydbwysedd ar y trawstiau pren a’r cerrig camu, rhoi cynnig ar adeiladu ffau, croesi’r pontydd neu ddringo’n uchel yn y gaer am oriau o hwyl deuluol. Mae yma hefyd feinciau picnic, sy’n ei wneud yn llecyn perffaith i fwynhau byrbryd neu ginio rhwng chwarae.

 

 

Pethau i’w gwneud i deuluoedd yn yr ardd

Mwynhewch y llwybr teulu diweddaraf neu ticiwch nifer o’r gweithgareddau 50 o bethau i’w gwneud cyn bod yn 11¾ yn yr ardd. Gallwch yn hawdd wneud Rhif 8 Gweld pysgodyn neu Rif 31 Dewch i adnabod pry ac mae’r ardd yn berffaith ar gyfer Rhif 1 – Dewch i adnabod coeden. 

Ymddiheurwn, ond ni chaniateir cŵn yn ein gardd Restredig Gradd 1, ond mae croeso iddynt ar yr ystâd 1,200 erw ac yn yr ardd de hyd at Iard y Domen.

Hwyl i bawb o'r teulu ym mharcdir Erddig

Mwynhewch lwybr sydd wedi ei farcio o gwmpas yr ystâd 1,200 erw neu ticiwch nifer o’n gweithgareddau 50 o bethau i’w gwneud cyn bod yn 11¾ ar yr ystâd. Gallwch wneud Rhif 1 yn hawdd iawn, dod i adnabod coeden neu Rif 5 Sgimio carreg ac mae’r pontydd ar yr afon yn berffaith ar gyfer Rhif 19, chwarae Rasys Priciau.

Yma ac acw ar hyd y llwybrau mae digon o fannau i fwynhau picnic, boed yn y coed, ger yr afon neu mewn cae.  

Mae croeso i gŵn sy’n cael eu rheoli’n ofalus ac ar dennyn yn ymyl anifeiliaid, yn arbennig yn y gwanwyn pan fydd ŵyn o gwmpas. Dewch i weld y rhan heb dennyn ger Melin Puleston lle gall eich ci grafu, ffroeni a charlamu’r hyn a fynno’n rhydd.