Crwydrwch yr ystâd yn Llanerchaeron

Clychau’r gog yn Llanerchaeron, Ceredigion | © National Trust Images / Gwen Potter

Mae Llanerchaeron yn wych ar unrhyw adeg o’r flwyddyn. Yn y gwanwyn mae’r blodau’n garped dros y goedwig, yn yr haf mae’r ystâd yn gôr o drydar ac yn fôr o liw, yn yr hydref mae’r dail ar dân yn eu gwisgoedd hydrefol, tra bod adar cynnar yn nythu mewn mannau go anarferol yn y gaeaf.

Gwanwyn ar Stad Llanerchaeron

Mae'r gwanwyn yn amser hyfryd yn Llanerchaeron. O amgylch y Stad mae blodau'r gwynt a chlychau'r gog yn gorchuddio llawr y coetir. Mae coed yn llawn o adar yn canu gan fod y tymor nythu ar ei anterth a’r dolydd yn fwrlwm o sŵn gwenyn a thrychfilod eraill ar y blodau gwyllt.

Dau oen newydd-anedig | © National Trust Images/Heather Birnie

Y buarth yn Llanerchaeron

Dyluniwyd yr iard stoc ar y fferm yn Llanerchaeron yn ofalus i gartrefu a magu anifeiliaid fferm i gyflenwi cig a chnydau grawnfwyd i’r ystâd.

Ar eich ymweliad, edrychwch o gwmpas yr iard stoc i weld a fedrwch chi ddyfalu at ba ddiben y defnyddiwyd yr adeiladau.

Cewch wybod am frîd defaid prin Llanwennog, y mae Llanerchaeron yn dal i fod yn gartref iddynt hyd heddiw. Dewch yma yn y gwanwyn a gallwch fod yn ddigon lwcus i weld ŵyn newydd-anedig.

Ewch i chwilota’r buarth ymhellach ac efallai y cewch weld dau gob Cymreig. Mae Tomos a Seren yn bâr llawn cymeriad, fu’n byw gyda’i gilydd am y rhan helaeth o’u hoes, ac sydd i’w gweld fel arfer yn eu stabl.

Ymweld gyda chŵn

Mae croeso i gŵn chwilota’r prif safle, gan gynnwys y gerddi, y tiroedd hamdden a’r llyn.

Cerdded ar yr ystâd

Mae digonedd o deithiau cerdded i’w mwynhau yn Llanerchaeron. Beth am fwynhau taith gerdded o gwmpas yr ystâd yn ystod yr oriau agor, neu beth am fynd am dro drwy’r parcdir.

Cerddwch drwy’r cysgodion y goedwig yn chwilio am fywyd gwyllt, gyda’r afon Aeron yn byrlymu wrth eich ymyl. Mae’r fflora ffantastig yn y goedwig yn un o’r rhesymau y mae wedi’i diogelu fel Safle o Ddiddordeb Gwyddonol Arbennig.