Diwrnodau allan i'r teulu yn Llanerchaeron
Mwynhewch ddiwrnod yn crwydro gerddi, stablau traddodiadol, iard fferm, llyn a llwybrau yn y goedwig. Gweld pa anifeiliaid sydd ar fuarth y fferm ac ymweld â’r certi hynafol, y tractorau a’r rholer stêm yn yr ysguboriau. Gadewch i’r plant archwilio byd natur, gweld bywyd gwyllt lleol a chymryd rhan yn ein gweithgareddau tymhorol.
Calan Gaeaf
21 Hydref - 1 Tachwedd, 10am- 4.30pm
Yr hydref hwn, camwch i fuarth traddodiadol ac archwiliwch ddathliad blynyddol Calan Gaeaf, traddodiad Cymreig sy’n nosi diwedd tymor y cynhaeaf a dechrau misoedd oerach y gaeaf sydd i ddod.
Wedi’i wreiddio mewn llên gwerin ac yn canolbwyntio ar gymuned, roedd Calan Gaeaf yn amser pan oedd teuluoedd a chymdogion yn dod ynghyd i ddathlu’r cynhaeaf, rhannu straeon a pharatoi ar gyfer troad y tymhorau. Cymerwch ran yn nhreftadaeth ddiwylliannol Cymru y tymor hwn wrth gymryd rhan mewn gweithgareddau addas i deuluoedd.
Dysgwch am y Ffest y Wrach ddirgel cyn cymysgu eich diodydd hudolus eich hun, wedi’u hysbrydoli gan hanesion traddodiadol. Dewch ynghyd ar gyfer sesiynau adrodd straeon lle mae hanesion Cymreig yn dod yn fyw, a darganfyddwch sut roedd cymunedau’n arfer dathlu’r adeg arbennig hon o’r flwyddyn.
Archwiliwch y tŷ wedi iddi nosi gyda theithiau gyda’r nos, a chlywch fwy am y bobl a oedd yn arfer galw Llaneracheron yn gartref*.
O lên gwerin a thraddodiadau teuluol i arferion cynhaeaf a defodau tymhorol, mae digonedd i’w fwynhau a’i archwilio.
*Mae archebu’n hanfodol ar gyfer y Teithiau Tŷ ar ôl Tywyllwch, sy’n addas ar gyfer oedran 12+ yn unig.
Gweithgareddau i bawb
Mae rhywbeth at ddant pawb yn Llanerchaeron yr haf hwn. O archwilio casgliad Geler Jones, i gamu i’r Fila Sioraidd gartrefol. Sicrhewch eich bod yn aros ger buarth y fferm i weld y ceffylau, moch, ieir a'r hwyaid cyn camu trwy’r hen ddrws i ardd furiog brics coch hyfryd yn llawn lliwiau’r haf.
P’un a ydych yn chwilio am antur neu rywle tawel i ddianc iddo, mae Llanerchaeron yn cynnig rhywbeth i bawb yr haf hwn ac edrychwn ymlaen at eich croesawu chi i gyd.
Archwilio’r Fila
Yn y fila (tŷ) Sioraidd, gallwch ddysgu llawer o bethau am y teulu Lewes a arferai fyw yn Llanerchaeron. Cofiwch fynd i weld cwrt y gwasanaethau, yn cynnwys y llaethdy, y becws a’r tŷ mwg. Efallai i chi hyd yn oed ddod ar draws un o gathod enwog Llanerchaeron, Eira sydd i'w gweld yn crwydro o amgylch y tŷ a Tomos yn yr ardd neu ar y buarth.
Buarth y fferm a Casgliad Geler Jones
Wrth ymweld a’r buarth traddodiadol dychmygwch be fyddai defnydd gwreiddiol yr adeiladau a’r anifeiliaid. Efallai y gwelwch y moch, lloi, y dofednod neu’r merlod Cymreig.
Ym mhen pellaf y buarth cewch hyd i Gasgliad Geler Jones, arddangosfa o offer gwledig traddodiadol, yn amaethyddol a domestig, gan gynnwys hen dractorau a stêm-roler.
Ystafell chwarae’r Hen Stablau
Beth am ymryson gyda’ch teulu a’ch cyfeillion trwy gymryd rhan mewn gornest ping-pong neu bêl-droed bwrdd, neu eisteddwch yn ôl ac ymlaciwch trwy wneud rhywfaint o liwio neu chwarae dominos.
Yr ardd a’r llyn
Sylwch ar y tymhorau yn yr ardd furiog gan weld beth sy'n tyfu wrth i chi ymweld; neu ddilyn y llwybr coed tymhorol sydd ar gael.
Ymgollwch ym myd natur a mwynhau harddwch y gerddi, y llyn a’r coetiroedd. Mae tiroedd Llanerchaeron yn cynnig digon o gyfleoedd i archwilio llwybrau gwastad, hygyrch. Mae’r daith fer, gylchol o amgylch y llyn, y stablau a’r iard fferm, i’r tŷ a’r gerddi muriog yn hygyrch i gadeiriau olwyn neu bramiau. Mae’r tiroedd pleser a’r llyn yn cynnig cysgod braf gyda meinciau, a chewch gyfle i fwynhau’r bywyd gwyllt.
Cynllunio eich ymweliad gyda’r teulu
I’ch helpu i gynllunio’ch diwrnod allan ymlaen llaw, dyma ychydig o wybodaeth allweddol:
· Gallwch ddod o hyd i'n holl oriau agor yma ar gyfer gwahanol rannau'r ystâd. Cynghorwn eich bod yn cael golwg ar ein horiau agor cyn i chi deithio oherwydd gall amseroedd agor newid yn dibynnu ar y tymor.
· Cymerwch ran yn ein digwyddiadau hwyliog trwy gydol y flwyddyn. Gallwch bori drwy’r cyfan yma.
· Mae croeso i gŵn ar dennyn o gwmpas y rhan fwyaf o’r ystâd ac yn y caffi. Darllenwch fwy am ymweld â’ch ffrind pedair coes yma.
· Mae toiledau anabl a chyfleusterau newid ar gyfer babanod yn yr adeilad ymwelwyr wrth y maes parcio, a gyferbyn â’r stablau.
· Gellir gweld prisiau mynediad ar ein tudalen we yma (Gall aelodau'r Ymddiriedolaeth Genedlaethol gael mynediad am ddim).
· Os ydych chi’n ymweld â chadair olwyn neu bram, mae mynediad gwastad o’r maes parcio i’r tŷ, yr ardd furiog, o amgylch y llyn ac iard y fferm. Sylwch y gallai rhai llwybrau coetir fod yn anaddas. Os oes angen cymorth neu ragor o wybodaeth arnoch chi, gofynnwch i aelod o’n tîm cyfeillgar.