Y gerddi yn Nyffryn

Uchafbwyntiau’r gwanwyn

Mae’r ardd yn hardd drwy gydol y flwyddyn, ond mae’r gwanwyn bob amser yn ddathliad mawr o oleuni, lliw a gwead.

Cyn gynted ag y cyrhaeddwch, bydd y cennin Pedr llon yn eich cyfarch wrth y fynedfa, a gallwch eu gweld yma ac acw ar bob cam o’ch taith drwy’r gerddi. Ar ddechrau eich siwrne, fe welwch ein henwog Fanc y Cynel – sy’n fôr o grocysau, cennin Pedr a lilis bach gwynion hwyr. Mae pobl yn ymweld â ni bob blwyddyn i dynnu llun o Fanc y Cynel pan mae ar ei harddaf.

O’r fan hon, cerddwch i’r Ardd Goed i weld y blagur yn dechrau agor, neu crwydrwch i Lawnt y De i weld yr arddangosfeydd helaeth o diwlipau a chennin Pedr, sy’n dod â bach o wmff i ffurfioldeb y lawnt. O’r fan hon gallwch weld y coed Magnolia yn britho’r olygfa’n binc a gwyn, gan eich denu i ddarganfod y Gardd-Ystafelloedd.

Cewch eich sgubo i bedwar ban byd yn ein Gardd-Ystafelloedd thematig, o’r Eidal yn ein Gardd Bompeiaidd (sydd newydd ailagor), lle bydd y Wisteria’n blodeuo’r holl ffordd i fyny colofnau’r ardd cyn bo hir, i bellafoedd byd yn yr Ardd Egsotig. Yng Ngerddi’r Gegin gerllaw, mae blagur y Coed Gellyg, Afalau a Bricyll yn ffrwydro, ac mae blagur enwog ein Coed Ceirios yn dechrau ymestyn ei freichiau ar draws y safle.

Mae’r gwanwyn yng Ngerddi Dyffryn wir yn wledd i’r llygaid.

Taith gerdded ‘Ble mae’r blagur?’

Cadwch olwg am y blagur wrth i’r gwanwyn gyrraedd ar y daith hon o gwmpas y gerddi.  Ymysg ein ffefrynnau mae blagur y Goeden Fricyll, y Magnolia, y Wisteria ac, wrth gwrs, y Coed Ceirios enwog. Mae natur fyrhoedlog a newidiol y blagur yn golygu, rhwng Mawrth a Mai, y gallwch weld pethau gwahanol ar eich taith yn dibynnu ar yr adeg o’r flwyddyn, felly bob tro yr ymwelwch chi, fe welwch rywbeth newydd.

Casglwch daflen ‘Ble mae’r blagur?’ o’r Ganolfan Groeso wrth gyrraedd. Mae’n cynnwys map o’r gerddi cyfan ac mae uchafbwyntiau’r gwanwyn wedi’u hamlygu fel y gallwch ddod o hyd iddyn nhw’n hawdd. Mae’r map hefyd yn dangos ble mae ein Tŷ Gwydr, lle cewch flas ar y trofannol i'ch paratoi ar gyfer tywydd poethach yr haf.

Ar gefn y daflen gallwch ddysgu am waith ein garddwyr yn ystod y gwanwyn, beth rydym yn ei wneud i annog bioamrywiaeth a mynd i’r afael â newid hinsawdd, a beth gallwch chi ei wneud i ddathlu’r gwanwyn a helpu’r amgylchedd yn eich gardd neu ofod awyr agored chi hefyd.

Gŵyl y Blagur

Mae Gŵyl y Blagur yn achlysur blynyddol yn yr Ymddiriedolaeth Genedlaethol i helpu pobl i gysylltu â harddwch ac ystyr blagur drwy weithgareddau a'r uchafbwyntiau tymhorol sydd i’w gweld yng Ngerddi Dyffryn.

Rydym yn cynnal cyfres o ddigwyddiadau drwy gydol y gwanwyn i helpu pobl i werthfawrogi a dathlu'r natur o'u cwmpas yn ystod y tymor hwn o egni newydd a harddwch.

Mae'r digwyddiadau hyn wedi'u cynllunio i fod yn hwyl, rhoi hwb i’ch iechyd meddwl, annog meddwlgarwch a lledaenu llawenydd. Maent yn amrywio o'n taith gerdded dymhorol i weithdai lluniau blagur a sesiynau creu torchau, ac maent yn rhedeg o 1 Mawrth i 31 Mai. Mae’r holl ddigwyddiadau wedi’u rhestr yn yr adran ddigwyddiadau – fe welwch yr holl wybodaeth sydd ei hangen arnoch yma.

Taith Gwledd y Gwanwyn

Cadwch olwg am flagur wrth i’r gwanwyn gyrraedd ar y daith hon o gwmpas y gerddi. Ymysg ein ffefrynnau mae blagur y Goeden Fricyll, y Magnolia, y Wisteria ac wrth gwrs y Coed Ceirios enwog. Mae natur fyrhoedlog a newidiol y blagur yn golygu, rhwng Mawrth a Mai, y gwelwch bethau gwahanol ar eich taith, yn dibynnu ar adeg eich ymweliad, felly bob tro y byddwch chi’n ymweld byddwch chi’n gweld rhywbeth newydd.

Casglwch daflen Gwledd y Gwanwyn o’r Ganolfan Groeso wrth gyrraedd. Mae’n cynnwys map o’r gerddi cyfan ac mae uchafbwyntiau’r gwanwyn wedi’u hamlygu fel y gallwch ddod o hyd iddyn nhw’n hawdd.