Darganfyddwch fwy yng Ngerddi Dyffryn
Dysgwch pryd mae Gerddi Dyffryn ar agor, sut i gyrraedd yno, pethau i’w gweld a’u gwneud a mwy.
Y gerddi yn Nyffryn
Gyda gardd-ystafelloedd clud, lawntiau ffurfiol a gardd goed fawr, mae digon i’w ddarganfod yn ystod eich ymweliad. Dros yr ychydig flynyddoedd nesaf, bydd y gerddi 55 erw hyn yn gweld rhaglen adfywio uchelgeisiol i’w hadfer i’w gwir ogoniant o’r 1920au.
Uchafbwyntiau’r gwanwyn
Mae’r ardd yn hardd drwy gydol y flwyddyn, ond mae’r gwanwyn bob amser yn ddathliad mawr o oleuni, lliw a gwead.
Cyn gynted ag y cyrhaeddwch, bydd y cennin Pedr llon yn eich cyfarch wrth y fynedfa, a gallwch eu gweld yma ac acw ar bob cam o’ch taith drwy’r gerddi. Ar ddechrau eich siwrne, fe welwch ein henwog Fanc y Cynel – sy’n fôr o grocysau, cennin Pedr a lilis bach gwynion hwyr. Mae pobl yn ymweld â ni bob blwyddyn i dynnu llun o Fanc y Cynel pan mae ar ei harddaf.
O’r fan hon, cerddwch i’r Ardd Goed i weld y blagur yn dechrau agor, neu crwydrwch i Lawnt y De i weld yr arddangosfeydd helaeth o diwlipau a chennin Pedr, sy’n dod â bach o wmff i ffurfioldeb y lawnt. O’r fan hon gallwch weld y coed Magnolia yn britho’r olygfa’n binc a gwyn, gan eich denu i ddarganfod y Gardd-Ystafelloedd.
Cewch eich sgubo i bedwar ban byd yn ein Gardd-Ystafelloedd thematig, o’r Eidal yn ein Gardd Bompeiaidd (sydd newydd ailagor), lle bydd y Wisteria’n blodeuo’r holl ffordd i fyny colofnau’r ardd cyn bo hir, i bellafoedd byd yn yr Ardd Egsotig. Yng Ngerddi’r Gegin gerllaw, mae blagur y Coed Gellyg, Afalau a Bricyll yn ffrwydro, ac mae blagur enwog ein Coed Ceirios yn dechrau ymestyn ei freichiau ar draws y safle.
Mae’r gwanwyn yng Ngerddi Dyffryn wir yn wledd i’r llygaid.
Taith gerdded ‘Ble mae’r blagur?’
O fis Mawrth i fis Mai cymerwch ran yn #GwleddyGwanwyn a chadw llygad am arwyddion o’r gwanwyn wrth i wahanol goed ddechrau blodeuo. Dilynwch ein Llwybr Gwledd y Gwanwyn i ddod o hyd i uchafbwyntiau gorau’r gwanwyn. Casglwch fap Llwybr Gwledd y Gwanwyn o’r Ganolfan Groeso wrth gyrraedd a bydd yn eich tywys o amgylch yr enghreifftiau gorau a harddaf o flodau'r gwanwyn yn ein gerddi. Tra byddwch chi ar eich taith, dysgwch sut i dynnu lluniau gwych o flodau yn ein gorsafoedd ffotograffiaeth ymarferol. Neu benthycwch becyn creadigol am ddim (sy'n cynnwys pad braslunio a phaent dyfrlliw) i gofnodi'r blagur drwy fath gwahanol o gelf.
Drwy gydol y tymor, bydd yr hyn a welwch ar eich taith yn newid, felly mae'n werth galw ’nôl ambell dro i weld y gorau o'r tymor cyfan. Cadwch eich map a dewch yn ôl trwy gydol y gwanwyn i weld y cyfan.
Does dim tâl ychwanegol am fap Llwybr Gwledd y Gwanwyn (ond bydd angen talu’r pris mynediad arferol i’r gerddi).
Pethau eraill o ddiddordeb i chi
Hanes Dyffryn
Adeiladodd John Cory y tŷ a’r gerddi yn Nyffryn gyda’r cyfoeth a enillodd drwy ei orchestion yn y diwydiant glo.
Bwyta a siopa yng Ngerddi Dyffryn
Mwynhewch brydau i dwymo’r galon neu snac ysgafn yn y caffi, gyda danteithion blasus yn goron ar eich ymweliad. A chofiwch alw i mewn i’r siop i brynu rhywbeth i gofio’ch ymweliad.
Lawrlwythwch fap yr ardd
Trefnwch eich ymweliad â Dyffryn a lawrlwytho map yr ardd
Ymweld â Gerddi Dyffryn gyda’ch grŵp
Ymwelwch â Gerddi Dyffryn fel grŵp a mwynhau gostyngiadau ar ffioedd mynediad, teithiau o’r gerddi Edwardaidd a bwyd blasus yn y caffis.
Gwirfoddoli yng Ngerddi Dyffryn
Dysgwch sut y gallwch gyfrannu yng Ngerddi Dyffryn a chael golwg ar y gwahanol gyfleoedd sydd ar gael.
