Ynni adnewyddadwy yng Nghastell Penrhyn

Manteision ariannol

Mae’r prosiect wedi cael effaith amgylcheddol, gan arbed 80 tunnell o allyriadau CO² y flwyddyn ac mae wedi cyfrannu at darged yr Ymddiriedolaeth Genedlaethol o gael 50% o’i ynni o ffynonellau adnewyddadwy erbyn 2020. Mae hefyd wedi bod o fudd uniongyrchol i’r eiddo yn ariannol o ran costau gweithredol.

Mae’r bwyler yn defnyddio sglodion coed a brynwyd yn lleol a sglodion coed o goetir Castell Penrhyn, yn unol â’r polisi rheoli coetir, i wresogi’r Castell.

Yn ogystal ag arbed arian a lleihau allyriadau CO², mae’r prosiect hefyd wedi lleihau’r risgiau sy’n gysylltiedig â storio olew trwy gael gwared ar bedwar o danciau olew mawr a fu yn yr eiddo.

Prosiect Dŵr Uisce yng Nghastell Penrhyn

Defnyddiodd prosiect yng Nghastell Penrhyn yn 2018 dechnoleg adfer gwres i dynnu gwres o’r dŵr gwastraff oedd yn llifo o geginau anferth yr eiddo a’i ailgylchu i gynhesu’r dŵr oer oedd yn dod i mewn i’r gegin. Roedd hyn yn golygu bod gan y bwyler lai o waith i’w wneud, gan arbed ynni a lleihau’r allyriadau nwyon tŷ gwydr.

Cydweithio

Mae’r system a osodwyd yng Nghastell Penrhyn yn rhan o ymwneud yr Ymddiriedolaeth Genedlaethol a’r prosiect Dŵr Uisce, sy’n gynllun cydweithio rhwng Prifysgol Bangor a Choleg y Drindod, Dulyn. Dywedodd Dr Prysor Williams, arweinydd prosiect Dŵr Uisce ym Mhrifysgol Bangor y gallai’r prosiect ‘wneud gostyngiad sylweddol yn yr ynni a ddefnyddir yng Nghastell Penrhyn, a thrwy hynny leihau costau a lleihau ôl troed carbon yr atyniad ymwelwyr prysur iawn hwn’.

Roedd y prosiect yn rhan o Raglen Cydweithredu Iwerddon-Cymru rhwng 2014-2020, oedd yn cael ei gefnogi gan Gronfa Ddatblygu Gwledig Ewrop (ERDF).