Gweithgareddau awyr agored ym Mhorthor

Golygfa o’r machlud dros y traeth ym Mhorthor, Gwynedd. Mae’r môr ar drai ac mae cerrig mawr a mân wedi eu gwasgaru ar y tywod yn y blaendir. — Y traeth ym Mhorthor. | © National Trust Images/Joe Cornish

Mwynhewch y golygfeydd rhyfeddol ar hyd yr arfordir garw hwn ar ochr ogleddol Penrhyn Llŷn. Nid yn unig mae’r arfordir yn hardd, mae’n hwyl hefyd. Os byddwch chi’n syrffio, corff-fyrddio neu mewn caiac, byddwch wrth eich bodd yn y dŵr ym Mhorthor.

Pethau i’w gwneud ar draeth Porthor

Mae’r traeth yn enwog am ei dywod gwichlyd, ac mae’r traeth diarffordd yma yn un o’r traethau perffeithiaf yng Nghymru. Allwch chi ddim peidio â gwirioni ar ei harddwch. Crwydrwch ar hyd traeth gwych i deuluoedd a mwynhau lle gwych i ymlacio.

Cerdded ar hyd y tywod gwichlyd

Gelwir y traeth yn ‘Whistling Sands’ yn Saesneg, sy’n deillio o’r wich neu’r chwib sy’n cael ei greu gan y gronynnau tywod o siâp penodol sy’n rhwbio yn ei gilydd pan fydd rhywun yn cerdded arnynt mewn tywydd cynnes. Gellir gwneud y sŵn trwy daro neu lithro eich traed ar dywod sych.

Man pulling a child on an inflatable in the sea at Whistling Sands, Porthor, Gwynedd — Playing in the sea at Whistling Sands, Porthor | © National Trust Images/Arnhel de Serra

Syrffio a chorff-fyrddio ym Mhorthor

Gall y tonnau yma fod yn ddelfrydol ar gyfer syrffio a chorff-fyrddio yn yr amodau cywir. Bydd y tonnau mwyaf fel arfer ym Mhorth Neigwl, ond pan fydd gwynt o’r tir ym Mhorth Neigwl, gall Porthor gynnig lle braf, cysgodol i syrffio.

Dewch i syrffio

I’r rhai lwcus, fe gewch chi donnau tiwbaidd, sy’n troelli at y lan, gwych i gorff-fyrddio ond rhaid bod yn ofalus gan fod un neu ddwy o greigiau o dan y dŵr.

Mae dau o blant yn plygu ac yn edrych ar y pyllau yn y creigiau ym Mhorthor. Un plentyn â bwced pinc yn ei law, a rhwyd gan y llall. — Chwilota’r pyllau yn y creigiau ym Mhorthor | © National Trust Images/Arnhel de Serra

Pethau i’w gweld ym Mhorthor

Bywyd gwyllt

Dewch o hyd i fywyd gwyllt o gwmpas y traeth. Gwelir morloi yn aml ger yr arfordir, yn arbennig os ydych yn corff-fyrddio yn y dŵr.

Gallwch fod yn ddigon lwcus i weld dolffiniaid. Mae’r ardal o gwmpas y traeth yn gadarnle i adar; chwiliwch am y frân goesgoch, gwalch y penwaig, gwylog, y wylan goesddu, mulfran, mulfran werdd a bras melyn ar hyd yr arfordir.

Y porthladd

Arferai Porthor fod yn borthladd prysur, yn mewnforio calch a glo ac yn allforio cynnyrch fferm fel menyn, caws, wyau a dofednod. Erbyn hyn dim ond yn yr haf y bydd y traeth yn prysuro pan fydd cri’r gwylanod yn cymysgu â sŵn pobl yn mwynhau eu hunain.

Cadwraeth

Gwnaed gwaith ar y caeau o amgylch y traeth, yn adfer y cloddiau traddodiadol. Mae’r banciau pridd â wyneb carreg yma yn cynnig coridor i fywyd gwyllt symud o gwmpas yr ardal, heb i bobl amharu arnyn nhw.