Hygyrchedd yn Stagbwll

Llogi Cerbyd Symudedd Tramper yn Ystâd Stagbwll

Os ydych yn cael trafferthion cerdded, gallwch barhau i fwynhau Ystâd Stagbwll, diolch i’r sgwter symudedd pob tir Tramper, ar gael i’w logi o’r dderbynfa yng Nghanolfan Stagbwll. Wrth archebu’r Tramper, gall y rhai ag anableddau symud grwydro llwybrau Tramper dynodedig gan werthfawrogi’r golygfeydd o’r llyn tawel a’r coetir deiliog.

Beth yw Tramper?

Sgwter symudedd pob tir trydanol yw’r Tramper, wedi’i lunio’n arbennig i deithio ar dir anwastad a glaswellt yn ddiogel. Gall fynd i fyny ac i lawr llethrau, dros ddarnau geirwon a gwreiddiau coed, drwy byllau bas ac ar dir mwdlyd a meddal.

Pwy all ei ddefnyddio?

Gall unrhyw un 14 oed a throsodd sydd ag anableddau symud ddefnyddio’r Tramper. Bydd angen caniatâd rhiant neu warcheidwad ar rai dan 18 oed.

Er bod y Tramper yn rhwydd i’w ddefnyddio, bydd angen i chi gwblhau gwiriad cymhwysedd gyrrwr a holiadur byr pan ydych yn cyrraedd, oherwydd tirwedd ddeinamig Ystâd Stagbwll.

I ble alla i fynd gyda’r Tramper?

Mae tri llwybr Tramper ar Ystâd Stagbwll:

1, Canol Stagbwll i Goedwig Lodge Park

Dilynwch lwybr y llyn o Ganol Stagbwll i Goedwig Lodge Park, lle dewch o hyd i nodweddion hanesyddol yn cynnwys y tŷ rhew a’r tŷ haf. Gallwch hefyd yrru ar lawnt Cwrt Stagbwll i brofi’r olygfa drawiadol tuag at y Bont Wyth Bwa a Phyllau Lili Bosherston.

2, Canol Stagbwll i Gei Stagbwll

Am daith hirach, dilynwch y llwybr o Ganol Stagbwll lawr at y Bont Wyth Bwa ac yna i fyny’r prif lwybr fferm sy’n arwain at Gei Stagbwll. (Noder, nid yw’r giatiau ar y llwybr troed caniataol hwn yn gwbl hygyrch. Bydd angen i gydymaith ddal y giatiau ar agor i chi a’u cau ar eich ôl). Cewch fwynhau golygfeydd arfordirol a lluniaeth yn Ystafell De’r Tŷ Cychod.

3, Canol Stagbwll i olygfan De Aberllydan

Dilynwch y llwybr o Ganol Stagbwll lawr at y Bont Wyth Bwa a chymryd llwybr y llyn i’r dde, tuag at Dde Aberllydan. Cadwch lygaid am lilïau dŵr ar eich taith a phrofi’r trawsnewid o goetir i’r arfordir wrth i chi gyrraedd golygfan De Aberllydan. Noder, ni ellir cael mynediad ar y traeth yn defnyddio’r Tramper.

Sut alla i archebu’r Tramper?

Mae archebu’n hanfodol. Rydym yn argymell eich bod yn archebu ddigon o flaen llaw, ac yn ddelfrydol lleiafswm o dri diwrnod cyn eich ymweliad. Y rheswm am hyn yw bod y Tramper yn boblogaidd a rhaid i aelod o staff hyfforddedig fod yn bresennol ar y diwrnod llogi.

Noder, mae’r Tramper ar gael bron bob dydd, dyddiau Llun-Gwener am y rhan fwyaf o’r flwyddyn. Ond dim ond yn ystod gwyliau haf ysgolion, a phenwythnosau gŵyl banc y Pasg a mis Mai y mae ar gael ar benwythnosau. Er mwyn i chi gael digon o amser i grwydro’r llwybrau sydd ar gael, dim ond un archeb y dydd a geir, rhwng 10am a 3pm.

E-bostiwch stackpole@nationaltrust.org.uk neu ffoniwch 01646 623110 i archebu’r Tramper. Cofiwch gynnwys rhif ffôn a chyfeiriad e-bost fel y gallwn gadarnhau argaeledd ac archeb. Cysylltwch â ni i ganslo os ydych yn newid eich meddwl fel y gall rhywun arall ddefnyddio eich lle.

Canllawiau Tramper

Caniatewch 30 munud i gwblhau ffurflen fer a chael cyflwyniad i offer llywio’r Tramper. Cewch gyfle i ymarfer, er mwyn i chi deimlo’n hyderus cyn cychwyn allan i grwydro’r penrhyn. Rhaid i chi fod dros 14 oed a bydd angen caniatâd rhiant neu warcheidwad ar rai dan 18 oed.

Gan nad yw signal ffôn symudol yr ardal yn dda iawn ar hyn o bryd, rhaid i gydymaith gerdded gyda chi pan fyddwch chi allan gyda’r Tramper, a rhaid i un ohonoch gario ffôn symudol sy’n gweithio rhag ofn anawsterau.

Nid yw rhai rhannau o’r llwybrau Tramper yn hygyrch i gerbydau achub felly rhaid i ddefnyddiwr y Tramper allu cerdded 500 metr pe bai’r cerbyd yn torri i lawr.

Defnyddio'r Tramper

Pan fyddwch yn cyrraedd derbynfa Canolfan Stagbwll, bydd aelod o staff hyfforddedig yn eich cyflwyno i offer llywio’r Tramper a chewch gyfle i ymarfer. Bydd hwn yn eich helpu i deimlo’n hyderus eich bod yn gallu rheoli’r Tramper yn ddiogel cyn cychwyn allan.

Edrychwn ymlaen at eich croesawu chi i Ystâd Stagbwll.