Llwybr coedwig a thraeth Abermawr
Cylchdaith drwy goedwigoedd clychau’r gog, gweirglodd, traeth gro a chors. Mae Abermawr yn cynnig taith braf ar un o rannau mwyaf garw’r arfordir. Dymuniad Brunel oedd creu porthladd a gorsaf gebl yma, ond daeth dim o’i gynlluniau.
Map
Dechrau:
Cylch troi traeth Abermawr, cyf grid: SM884347
1
O’r cylch troi, ewch drwy’r allanfa ar y llaw chwith gydag arwydd ‘Abercastell 3 milltir’. Ewch i lawr y llwybr tuag at y traeth.
Traeth Abermawr
Yn raddol, mae traeth gro Abermawr yn cael ei wthio’n ôl gan y môr. Yn y pen draw bydd bwlch yn cael ei greu, a bydd y môr yn llifo i’r gors a’r goedwig y tu hwnt iddo.
2
Ar gychwyn y traeth gro trowch i’r chwith i mewn i’r tir, drwy giât fochyn i gae sy’n gyfochrog â’r gors. Cyn bo hir mae’r gors yn troi’n goedwig gyda chlawdd â gordyfiant arni ar eich llaw dde.
3
Parhewch i gerdded o amgylch pen draw’r cae nes dewch at giât fochyn arall a llwybr i mewn i’r goedwig.
4
Cerddwch ar hyd llwybr y goedwig nes cyrhaeddwch giât mewn i gae.
Cymorth gwirfoddolwyr
Mae angen gwaith cynnal a chadw parhaol ar lwybrau fel hyn yn y goedwig. Beth am wirfoddoli gyda’r Ymddiriedolaeth Genedlaethol er mwyn ein helpu i ofalu amdanyn nhw?
5
Ewch ymlaen gan anelu am y giât pum-bar o’ch blaen. Ewch drwy’r giât hon a dros y nant, yna trowch yn syth i’r dde ac anelu’n ôl am y traeth.
6
Wrth y giât nesaf, ewch drwy’r giât fochyn i’r cae (mae’r llwybr ceffylau’n parhau ar hyd ochr y goedwig ar eich llaw dde heb fynd drwy’r giât). Croeswch y cae draw at y giât a welwch ar yr ochr draw. Yma mae’r llwybr a’r llwybr ceffylau’n ymuno unwaith eto.
7
Tua 200 llath (20m) heibio’r giât hon dringwch y stepiau ar eich llaw chwith. Cadwch i’r dde a dilynwch lwybr y goedwig tuag at y traeth. Fe welwch y gors yn dod i’r golwg ar eich llaw dde.
8
Bydd y llwybr yn eich tywys i’r traeth gro, gyda golygfeydd arfordirol gwych tuag at bentir creigiog Penbwchdy. Yn raddol, mae’r môr yma’n gwthio’r traeth gro yn ôl i’r gors. Cofiwch fwynhau picnic yma cyn cerdded yn ôl ar hyd y traeth i’r hewl.
Y glannau
Ar eich llaw dde wrth i chi gyrraedd y môr mae’r arfordir yn ymestyn tua’r gogledd tuag at arfordir garw Pen Strwmbwl. Mae’r môr yn prysur ddinistrio’r traeth yn y fan hon.
Diwedd:
Cylch troi traeth Abermawr, cyf grid: SM884347