Blwyddyn newydd, her newydd? Dechreuwch symud y mis Ionawr hwn gyda her rhedeg llwybr newydd Aberdaron wrth i’r Ymddiriedolaeth Genedlaethol lansio Taclo10 yng Nghymru

Gan ddechrau am 9am o faes Parcio’r Ymddiriedolaeth Genedlaethol ym Mhorth y Swnt, mae’r llwybr yn dilyn Llwybr Arfordir Cymru i gildraeth diarffordd Porth Meudwy, gan fwynhau golygfeydd ysblennydd o Fae Ceredigion cyn dychwelyd ar hyd y ffordd i Aberdaron.

Roedd cildraeth bychan Porth Meudwy ar ben eithaf Penrhyn Llŷn unwaith yn fan byrddio i bererinion oedd yn teithio i Ynys Enlli. Heddiw, dyma’r man lle gallwch groesi drosodd i Ynys Enlli ac mae’n borthladd bychan ar gyfer y llond dwrn o bysgotwyr sy’n ennill bywoliaeth yn dal crancod a chimychiaid yn y dyfroedd o amgylch Aberdaron.

Mae’r llwybr ei hun wedi’i raddoli’n las ar y canllaw rhedeg llwybrau oherwydd y tir anwastad a’i bellter o’r llinell gychwyn. Gall unrhyw un sydd eisiau rhoi cynnig ar yr her ddisgwyl rhai llwybrau arfordirol cul gyda grisiau serth achlysurol ar hyd y ffordd, felly mae esgidiau da a digon o ofal yn hanfodol cyn ymgymryd â’r ras.

Mae Mali Jones, Swyddog Profiad Ymwelwyr ar gyfer Ymddiriedolaeth Genedlaethol Cymru, hefyd yn ymwybodol y gallai pobl deimlo’n ofnus ar y dechrau gyda 10K llawn, ond nid oes angen gwneud y llwybr cyfan. Dywedodd Mali, ‘Gallwch ddewis pa mor bell rydych chi’n mynd, nid yw’n orfodol gorffen y 10K llawn o gwbl. Cwblhewch y cylch ddwywaith ar gyfer yr her 10K llawn neu rhedwch y 5K cyntaf a rhoi’r gorau iddi - mae hi i fyny i chi’n llwyr.’

‘Nid oes unrhyw bwysau o gwbl i orffen y llwybr llawn, felly pam na ddewch chi draw a gwneud yr hyn y gallwch chi. Anadlwch holl awyr iach y môr a mwynhau’r golygfeydd wrth i chi redeg. Y prif beth yw dechrau arni, ac wrth gwrs mae’r golygfeydd ar hyd Penrhyn Llŷn yn wobr wych ynddo’i hun!’

Ydych chi’n barod am yr her? Beth am osod nod newydd i chi’ch hun a mwynhau golygfeydd ysblennydd ar hyd y ffordd?

Mae’r digwyddiad yn cael ei gynnal ar bedwerydd Sul bob mis, ac eithrio mis Mai, Gorffennaf ac Awst. Cewch fanylion llawn, map o’r llwybr a rhestr lawn o ddyddiadau yma.