Taith hydref Castell Powis

Cymru

Ar y llwybr cerdded hydrefol hwn fe welwch chi’r ardd yn dod yn fyw mewn cymysgedd o goch, melyn, oren tywyll ac aur. Mwynhewch y blodau tymhorol ar hyd y borderi ar y terasau, mwynhewch grensian y dail dan eich traed yn y Gwyllt, a mwynhau aroglau melys y coed afalau yn yr Ardd Ffurfiol.

Eiddo ger

Powis Castle and Garden

Man cychwyn

Ciosg Gardd Castell Powis, cyfeirnod grid: SJ2152106369

Angen tocyn mynediad

Er mwyn dod i mewn i’r ardd, bydd angen i chi gasglu tocyn mynediad o’r Swyddfa Docynnau ym Mhowis.

Cyfeiriad
Castell Powis, Y Trallwng, Powys, SY21 8RF.
Cyfarwyddiadau trwy Google Maps
Ar y trên
Gadael yn y Trallwng, 1¼ milltir ar lwybr troed o Broad Street, trwy Ystâd Powis.
Ar droed
Taith 1 filltir o Park Lane, oddi ar Broad Street yn y Trallwng. Mynediad o’r Stryd Fawr (A490).
Ar fws
Gwasanaethau o Groesoswallt i’r Trallwng ac Amwythig i Lanidloes. Ar y ddau lwybr, gadewch y bws ar y Stryd Fawr, a chymryd y llwybr 1 filltir o Broad Street trwy Ystâd Powis.
Ar y ffordd
Arwyddion o’r ffordd fawr i’r Drenewydd (A483); dewch i mewn trwy’r giât gyntaf ar y dde. Parcio am ddim.
Cyfanswm y rhannau: 9
Cyfanswm y rhannau: 9
Man cychwyn
Ciosg Gardd Castell Powis, cyfeirnod grid: SJ2152106369
Rhan 1
Casglwch eich tocyn mynediad o’r Swyddfa Docynnau ac ewch i mewn i’r ardd. Dilynwch y llwybr a throi i’r chwith i’r Teras Uchaf. Arhoswch i edmygu’r aeron coch llachar ar y Cotoneaster ar y dde i chi cyn mynd ymlaen ar hyd y llwybr sy’n cynnig golygfeydd gwych ar draws yr ardd, Dyffryn Hafren a Bryn Breiddin.
Rhan 2
Ar ben y teras, ewch i lawr y grisiau ar y dde i chi i Deras y Tŷ Adar. Ar y dde, cymrwch eiliad i edmygu’r cerfluniau o’r 18fed Ganrif o fugeiliaid yn dawnsio sy’n addurno’r balwstrad cyn mynd i lawr y grisiau nesaf i Deras yr Orendy. Ar waelod y grisiau, ewch ar draws tu blaen yr Orendy ac ymlaen rhwng y borderi cyfochrog sydd o’ch blaen.
Border oer
Mae’r border cyfochrog hwn, a adnabyddir fel y border oer, yn llawn blodau glas, pinc a lelog o ddechrau’r haf hyd at rew cyntaf yr hydref. Wrth i chi gyrraedd y border sylwch ar y peithwellt ar y chwith sy’n rhoi siâp a strwythur i’r border o fis Medi i fis Chwefror. Wrth i’r tymor fynd yn ei flaen gwyliwch wrth i adar gasglu bwyd o hadau’r blodau ac edmygu siâp cain y gwe pry cop sy’n disgleirio yn niwl yr hydref.
Rhan 3
Ewch ymlaen trwy’r bwlch yn y gwrych pren bocs ar ben y border a dilyn y llwybr cyntaf ar y chwith, gyferbyn â’r cerflun paun. Wrth i chi wneud hynny, sylwch ar y coed Sumac (Rhus typhina) ar y chwith sydd â dail sy’n trawsnewid i sioe lachar o goch, oren a melyn yr amser yma o’r flwyddyn.
Teras isaf
Gyda border wedi ei blannu ar y chwith i chi a nifer o fasarn Japan, cwyros a choed mwg (Cotinus coggygria) ar y dde i chi, mae gan y Teras Isaf ddigon i’w gynnig yn ystod yr hydref. Yn y border sylwch ar egroes, blodyn-y-gwynt Japaneaidd a’r ‘Beauty Berry (Callicarpa bodinieri) gyda’i haeron fioled lliwgar. Ar y dde fe welwch glystyrau o grocws porffor yr hydref (Colchicum autumnale), rhisgl brown tywyll papuraidd y Fasarnen Bapuraidd (Acer griseum), a mwynhewch aroglau melys siwgr llosg yn codi o ddail y Cercidiphyllum japonicum wrth iddynt bydru. Tua phen y teras, sylwch ar y Gludwydden felys (Liquidambar styraciflua).
Rhan 4
Ar ben y teras, ewch i lawr y grisiau ar y dde ac ar y gwaelod trowch i’r chwith i’r Ardd Ffurfiol. Dilynwch y llwybr yn syth ymlaen ac ar y pen trowch i’r dde i ddal i fynd heibio ein bwthyn gwyliau du a gwyn ffrâm bren, Y Bwthyn, oedd yn gartref i lawer o arddwyr Powis yn y cyfnod Edwardaidd. Ewch yn eich blaen yn syth a chymryd y llwybr nesaf ar y dde. Wrth i chi wneud hynny cymrwch eiliad i sylwi ar y gwahanol winwydd yn dringo’r bwa sy’n llawn o liwiau’r hydref.
Coed afalau yn yr Ardd Ffurfiol
Wrth i chi gerdded trwy’r Ardd Ffurfiol edmygwch y coed afalau sydd wedi eu meithrin yn ofalus a blannwyd gan yr Arglwyddes Violet, gwraig y 4ydd Iarll Powis yn 1911. Mwynhewch aroglau melys y gwahanol fathau o ffrwythau yn aeddfedu ac os byddwch chi’n lwcus efallai y bydd rhai ar werth yn Siop Goffi’r Ardd. Mae’r holl daliadau am gynnyrch yn cefnogi prosiectau yn ein gardd, gan gadw Powis yn arbennig am byth, i bawb.
Rhan 5
Ar ben y llwybr, fe welwch Siop Goffi’r Ardd o’ch blaen, perffaith os ydych am gynhesu gyda diod boeth a thamaid o gacen cyn mynd ymlaen i’r Gwyllt, coetir ffurfiol Powis. Cadwch Siop Goffi’r Ardd ar y chwith i chi ac ewch ar hyd y llwybr am ychydig fetrau cyn dringo’r grisiau tuag at y Lawnt Fawr. Ar ben y grisiau dilynwch y llwybr ar y chwith ac ewch ymlaen i’r coetir ar y set o risiau bas. Wrth i chi fynd ymlaen at yr olygfan, sylwch ar y goeden geirios gyda’i dail hydrefol ar y dde.
Rhan 6
Rhowch funud neu ddau i fwynhau’r olygfa eiconig o’r castell ar draws y Lawnt Fawr, a fydd, ar yr adeg yma o’r flwyddyn ag arddangosfa o liwiau’r hydref ar y llechwedd dan y Teras Isaf. Wedyn, cerddwch ar draws yr ardal o laswellt tu ôl i chi a heibio’r fâs carreg anferth cyn troi i’r dde. Ewch ymlaen trwy’r coetir ar y llwybr hwn, gan ddilyn cyrion yr ardd.
Coed lliwgar yr hydref
Wrth droi i’r dde, fe welwch blanhigfa o goed cyll o’ch blaen ac efallai y byddwch chi eto yn arogli aroglau melys siwgr llosg yn dod o Cercidiphyllum japonicum arall. Yn agos at y coed yma, fe welwch chi lewyrch oren y Nyssa sylvatica sydd yn un o’r coed mwyaf lliwgar yn y coetir yn yr hydref. Wrth i chi fynd ymlaen ar hyd y llwybr, cofiwch edrych ar y goeden Diwlip (Liriodendron tulipifera) felyn tanbaid hefyd.
Rhan 7
Ewch ymlaen ar hyd y llwybr o gwmpas cyrion yr ardd, gan gymryd y llwybr i’r chwith yn unrhyw fan lle mae’r llwybr yn fforchio. Wrth i chi gerdded, arhoswch i fwynhau’r golygfeydd hydrefol ar draws dyffryn Hafren tua Cornatyn a Chefn Hirfynydd tu ôl iddo.
Rhan 8
Wrth i chi gyrraedd cornel yr ardd, dilynwch y llwybr i’r dde. Sylwch ar ddail llachar yr hydref ar y coed bedw amrywiol gyda’u boncyffion gwyn ac ymhellach ar hyd y llwybr, boncyff anarferol y fasarnen rhisgl neidr. Cyn troi i’r chwith yn y fforch, sylwch ar y gochwydden arfor (Sequoia sempervirens) yn ymestyn tua’r nefoedd.
Rhan 9
Wrth i chi nesu at y Tŷ Rhew, rhowch eiliad i edrych i fyny ar ddail oren tywyll y goeden ffawydd ddeheuol (Nothofagus alpina). Ewch o gwmpas y pwll a mwynhau’r adlewyrchiadau hydrefol ar wyneb y dŵr. Ar yr ochr bellaf ger y ffens, chwiliwch am y Cryptomeria japonica ‘Elegans’ y mae ei dail yn newid i liw efydd tywyll. Daliwch i fynd o gwmpas y pwll ac i fyny’r llethr bychan nes y gwelwch chi giât fawr ar y chwith. Yma mae’r llwybr yn rhannu a bydd y mwyaf serth yn eich arwain heibio’r goeden Ginkgo felyn danbaid gyda’i dail anarferol. Daliwch i fynd yn ôl at Giosg yr Ardd y byddwch yn ei weld ar y chwith.
Man gorffen
Ciosg Gardd Castell Powis, cyfeirnod grid: SJ2152106369
Map llwybr
Taith hydref Castell Powis | © National Trust/Robert Polley
Dyna ni, da iawn chi
Rhannwch eich profiad

Castell a Gardd Powis

Darganfyddwch ardd restredig Gradd I a chastell canoloesol gyda chasgliad eang o arteffactau De Asiaidd yng Nghastell a Gardd Powis yng Nghanolbarth Cymru.

Taith gerdded hanesyddol Castell Powis

Dewch i archwilio haenau hanes yng ngardd Castell Powis ar y daith gerdded rwydd hon. Byddwch yn ymlwybro ar hyd terasau Eidalaidd, o gwmpas yr ardd ffurfiol a thrwy goetir y Gwyllt, cyn rhoi cwpaned braf o de yn wobr i chi eich hun.