Ble i weld cennin Pedr yng Nghymru

Menyw a phlentyn yn edrych ar y cennin Pedr yn yr ardd yng Nghastell Powis ym Mhowys, Cymru — Ymwelwyr yn edmygu’r cennin Pedr yng Nghastell Powis | © National Trust Images/Paul Harris

Wrth i ddiwrnodau oer, tywyll y gaeaf ddirwyn i ben, mae ein hemblem cenedlaethol yn blodeuo ledled Cymru, gan lonni’r dirwedd a dathlu dyfodiad y gwanwyn. Darganfyddwch yr arddangosfeydd cennin Pedr gorau o fis Chwefror i ddechrau Mai yn y gerddi rydym yn gofalu amdanynt ym mhob cwr o’r wlad.

Emblem cenedlaethol Cymru

Mae llawer o straeon am sut daeth y genhinen Bedr yn un o symbolau enwocaf Cymru, ond yn ôl y sôn dechreuodd popeth gyda’r genhinen ddiymhongar. Mewn brwydr, dywedodd Dewi, nawddsant Cymru, wrth ei filwyr am wisgo cenhinen i’w galluogi i wahaniaethu rhwng ei gilydd â’u gelynion, y Sacsoniaid.

Heddiw, mae’r ddau emblem yn cael eu gwisgo ar Ddydd Gŵyl Dewi ar Fawrth y 1af.

Ble i weld cennin Pedr yng Ngogledd Cymru

Golygfa o gennin Pedr yn y ddôl gyda’r tŷ yn y cefndir yng Ngardd Bodnant yng Nghonwy, Gogledd Cymru — Dôl y cennin Pedr yng Ngardd Bodnant, Gogledd Cymru | © National Trust Images/Derek Hatton

Gardd Bodnant, Conwy: Mae cenedlaethau o arddwyr wedi bod yn plannu cennin Pedr ym Modnant ers 1920, ac rydym yn dal i ychwanegu at yr arddangosfa heddiw. Mor gynnar â mis Ionawr, mae’r narsisws ‘Cedric Morris’ a’r Narcissus cyclamineus, neu’r genhinen Bedr atblygol, i’w gweld yng Ngardd y Gaeaf. Yna ym mis Mawrth a mis Ebrill, mae dôl yr Hen Barc a’r Glennydd yn fôr o felyn wrth i’r Narcissus pseudonarcissus cyffredin a llawer o fathau eraill flodeuo.Ymwelwch â Gardd Bodnant
Neuadd a Gardd Erddig, Wrecsam: Darganfyddwch arddangosfeydd hyfryd o gennin Pedr yn yr ardd restredig Gradd 1 hon sy’n dyddio’n ôl i’r 18fed ganrif ac sydd wedi’i hadfer yn llwyr. Dilynwch lwybr yr ardd tuag at y borderi ffurfiol neu crwydrwch ymysg y coed afalau a’r coed siâp côn i fwynhau arogl unigryw y rhywogaeth llygad y ffesant, ‘Narcissus poeticus’, sy’n blodeuo’n hwyr. I weld sioe fendigedig o flodau melyn, ewch ar hyd lan y gamlas yn yr ardd a chewch weld y blodau yn plygu yn yr awel a’u hadlewyrchiadau i’w gweld yn y dŵr.Dewch i Erddig
Castell Penrhyn, Gwynedd: Mae’r cennin Pedr cyntaf yng Nghastell Penrhyn yn aml yn dangos eu pennau ar ddiwedd Chwefror, mewn da bryd ar gyfer Dydd Gŵyl Dewi. Yna maent yn mynd o nerth i nerth – maen nhw ar eu hanterth o ganol Mawrth i ddiwedd Ebrill. Mae’r carped campus o felyn - mor ddramatig â’r castell Cymreig ei hun - yn gorchuddio pob twll a chornel o’r ardaloedd coediog o flaen ac i ochr y castell, yn ogystal ag o flaen y Gorthwr.Ymwelwch â Chastell Penrhyn
Tŷ a Gardd Plas Newydd, Ynys Môn: Yn fuan wedi’r eirlysiau y disgwylir i gennin Pedr roi sioe hyfryd yn yr ardd, yr ardd goed a’r parcdir hudolus ym Mhlas Newydd. Yn edrych dros y Fenai, fe welwch glystyrau o gennin Pedr melyn yn dawnsio o dan heulwen y gwanwyn ac wedi’u gosod hwnt ac yma o gwmpas yr ardd, gan ychwanegu lliw bywiog i’r ardd ffurfiol a’r borderi o flodau. Mae disgwyl i'r cennin Pedr fod ar eu gorau tua chanol mis Mawrth.Dewch i Dŷ a Gardd Plas Newydd

Ble i weld cennin Pedr yng Nghanolbarth Cymru

Golygfa o gennin Pedr yn yr ardd gyda Chastell Powis ar y bryn yn y cefndir ym Mhowys, Canolbarth Cymru. — Cennin Pedr yn eu blodau yng Nghastell Powis, Canolbarth Cymru | © National Trust Images/Paul Harris

LLanerchaeron, Ceredigion: Rhowch groeso i’r gwanwyn yn Llanerchaeron lle mae cennin Pedr gwyllt llachar yn gorchuddio’r coetir ger yr afon ac yn amgylchynu’r Lawnt Croce o flaen y Fila. Fe welwch fwy fyth yn britho’r Ardd Iseldiraidd a’r Ardd Furiog hefyd, lle bydd yr arogl jasmin cyfoethog, hyfryd yn eich dilyn o’r tŷ gwydr ar eich taith.Ymwelwch â Llanerchaeron
Castell a Gardd Powis, Powys: Mae gerddi teras Baróc Castell Powis a’i leoliad trawiadol ar ben bryn yn hynod ddramatig. Cewch fwynhau golygfeydd ysgubol ar draws Cwm Hafren wrth gofleidio’r gwanwyn. O ganol Mawrth hyd ddiwedd Ebrill, mae Narcissus pseudonarcissus, neu gennin Pedr gwyllt, yn blodeuo yn eu miloedd yn y Cae Cennin Pedr (sy’n enw addas iawn). Mae fioledau, magnolia, tiwlipau a’r sosin bach glas hefyd yn fôr o liw dros weddill yr ardd.Ymwelwch â Chastell a Gardd Powis

Ble i weld cennin Pedr yn Ne Cymru

Golygfa o’r tŷ drwy gennin Pedr yng Ngerddi Dyffryn ger Caerdydd yn Ne Cymru — Cennin Pedr yng Ngerddi Dyffryn, De Cymru | © National Trust Images/Rachael Warren

Gardd Goedwig Colby, Sir Benfro: Cadwch olwg am garpedi gwych o gennin Pedr ar draws y ddôl a bancyn y ddôl yng Ngardd Goedwig Colby. Yn 2011 a 2015, plannwyd 6,000 o fylbiau cennin Pedr yn yr ardd furiog a’r coetir hyfryd, felly gallwch ddisgwyl arddangosfa arbennig o ddiwedd fis Chwefror. Daw’r gwanwyn â môr o glychau’r gog a chrocysau hefyd, gyda blancedi o gamelias, asalêu a rhododendronau i ddilyn.Ymwelwch â Gardd Goedwig Colby
Gerddi Dyffryn, Caerdydd: Mae dros 50 o wahanol fathau o gennin Pedr yn pefrio ar lawntiau ac gardd-ystafelloedd Gerddi Dyffryn. O’r Narcissus bulbocodium, neu’r genhinen Bedr gylchog fechan, yn yr Ardd Gerrig i’r mathau ‘sioe’ melyn, gwyn a hufen mawr, does unman gwell i gofleidio’r gwanwyn. A pheidiwch â methu eu brîd eu hunain o genhinen Bedr: Narsisws ‘Dyffryn’, a enillodd statws rhyngwladol fel brîd newydd yn 2014.Ymwelwch â Gerddi Dyffryn
Tŷ Tredegar, Casnewydd: Ewch drwy’r giatiau i Ardd y Berllan a Gardd y Gedrwydden i weld lluoedd o gennin Pedr melyn o dan goed blodau. Uchafbwynt arbennig yn ystod y gwanwyn yw’r cennin Pedr melyn sy’n blodeuo ar hyd Rhodfa’r Derw ac o amgylch y goeden gastan, sy’n 250 mlwydd oed, yn y parcdir o ganol mis Mawrth.Dewch i Dŷ Tredegar