
Diwrnodau allan Nadoligaidd yng Nghymru
Profwch ddiwrnodau allan Nadoligaidd yng Nghymru, o gestyll a thai hanesyddol wedi’u haddurno ar gyfer tymor yr ŵyl i deithiau cerdded i'r teulu, gweithdai crefftau a goleuadau Nadolig ar ôl iddi nosi. Dewch i gwrdd â Siôn Corn, porwch drwy farchnadoedd Nadolig neu ddianc i ganol byd natur wrth fynd am daith gerdded aeafol. P’un a ydych yn ymweld â phlant bach, pobl ifanc yn eu harddegau, ffrindiau neu deulu, mae digon o ffyrdd o fwynhau’r Nadolig yn y lleoedd rydym yn gofalu amdanynt.
Neidio i
- Nadolig mewn cestyll a thai hanesyddol yng Nghymru
- Diwrnodau allan Nadoligaidd i'r teulu yng Nghymru
- Goleuadau Nadolig a digwyddiadau ar ôl iddi nosi
- Cwrdd â Siôn Corn a chymeriadau'r ŵyl yng Nghymru
- Marchnadoedd Nadolig a siopa Nadolig yng Nghymru
- Gweithdai Nadolig a chrefftau'r ŵyl
- Teithiau cerdded gaeafol a diwrnodau Nadoligaidd tawelach yng Nghymru
- Pethau eraill o ddiddordeb i chi
Nadolig mewn cestyll a thai hanesyddol yng Nghymru
Dewch o hyd i rai o’r addurniadau Nadolig mwyaf trawiadol mewn cestyll a thai hanesyddol ledled Cymru. O goed Nadolig anferth ac ystafelloedd llawn addurniadau i arddangosfeydd theatrig a thraddodiadau'r ŵyl sydd wedi’u hysbrydoli gan ganrifoedd o hanes, mae gan bob lle ei ffordd hudolus ei hun o ddathlu’r tymor.
Tŷ Tredegar, Casnewydd
Teithiwch drwy 500 mlynedd o Nadolig yn Nhŷ Tredegar, lle mae’r addurniadau disglair drwy’r tŷ wedi’u hysbrydoli gan draddodiadau'r ŵyl o wahanol gyfnodau yn ei hanes. O wleddoedd y Tuduriaid i fwffes hiraethus yr 1980au, dysgwwch sut mae’r Nadolig wedi newid dros y canrifoedd.

Castell Y Waun a’r Ardd, Wrecsam
Dewch i mewn i fyd The Snow Queen, lle mae addurniadau cywrain, setiau theatrig a thirluniau sain trochol yn dod â’r stori aeafol hon yn fyw drwy’r Ystafelloedd Swyddogol. Dilynwch y stori drwy’r castell cyn canfod coed Nadolig ac addurniadau mwy traddodiadol yn Adain y Dwyrain.

Castell Penrhyn a'r Ardd, Bangor
Profwch draddodiadau Nadolig Gogledd Cymru yn y bedwaredd ganrif ar bymtheg yn ystafelloedd isaf Castell Penrhyn. Cewch eich croesawu gan dorch enfawr wedi’i gwneud o wyrddni lleol, edmygwch goed addurnedig a goleuadau disglair, a safwch o dan y goeden ddisglair sy’n codi’n uchel yn y Neuadd Fawr a chardiau Nadolig mwy na'r arferol yn dod â golygfeydd o ddathliadau Nadolig y gymuned leol yn fyw.

Neuadd a Gardd Erddig, Wrecsam
Ymunwch â Scrooge ar ei daith o ‘Bah, humbug!’ i lawenydd bore Nadolig wrth i A Christmas Carol gan Charles Dickens ddod yn fyw yn Erddig. Crwydrwch ystafelloedd hanesyddol wedi’u haddurno ar gyfer y tymor, gyda choed Nadolig, gwyrddni Nadoligaidd a golygfeydd hudolus wedi’u hysbrydoli gan y clasur poblogaidd hwn.

Dinefwr, Sir Gaerfyrddin
Crwydrwch drwy Dŷ Newton wedi’i addurno ar gyfer y Nadolig a manteisiwch ar gyfle i dynnu llun o dan goeden boblogaidd Creaduriaid Dinefwr yn y Neuadd Fewnol. Edrychwch yn ofalus a byddwch yn darganfod addurniadau wedi’u gwneud â llaw gan artist lleol, wedi’u hysbrydoli gan y bywyd gwyllt sy’n byw ar yr ystâd.

Diwrnodau allan Nadoligaidd i'r teulu yng Nghymru
O straeon Nadolig poblogaidd a gweithgareddau creadigol i lwybrau Nadoligaidd ac anturiaethau awyr agored, mae digon o ffyrdd i deuluoedd fwynhau’r Nadolig gyda’i gilydd. Dewch o hyd i ddiwrnod allan i blesio plant ieuengach, plant hŷn a phobl ifanc yn eu harddegau, p'un a ydynt wrth eu bodd â chrefftau, yn crwydro, yn gwrando ar straeon neu'n troi llaw at rywbeth newydd.
Plas Newydd a’r Ardd, Ynys Môn
I deuluoedd sy’n chwilio am rywbeth ychydig yn wahanol, dewch i ymuno yn hwyl yr ŵyl gyda disgo Nadolig distaw yn yr Ystafell Gerdd. Gyda dewis o gerddoriaeth i’w mwynhau gyda’ch gilydd, mae’n brofiad Nadoligaidd sy’n apelio at bob cenhedlaeth, o blant oed cyn-ysgol i bobl ifanc yn eu harddegau. Mae angen archebu ymlaen llaw.

Neuadd a Gardd Erddig, Wrecsam
Gall plant chwilfrydig chwilio am Scrooge, ysbrydion y Nadolig a golygfeydd o A Christmas Carol y tu mewn i’r tŷ, cyn mynd allan i fwynhau mwy o hwyl yr ŵyl. Dilynwch lwybr y plant drwy’r ardd, chwiliwch am geirw o goed helyg a chymeriadau eraill, a thostiwch falws melys ar y ffordd.

Castell Penrhyn a'r Ardd, Bangor
I blant sydd â dychymyg mawr, ymunwch â sesiynau adrodd straeon rhyngweithiol a hud sy’n dod â chwedlau Nadoligaidd yn fyw. Wedyn, archwiliwch yr addurniadau yn ystafelloedd isaf y Castell, chwaraewch â theganau pren traddodiadol, crëwch dagiau anrhegion ym Mhantri Bwtler a chwiliwch am y llygod Nadolig sy’n cynnal eu dathliadau tymhorol eu hunain yn y Gegin Fictoraidd.

Dinefwr, Sir Gaerfyrddin
I deuluoedd sy’n chwilio am ddiwrnod allan Nadoligaidd ym mha bynnag dywydd, ewch i weld Tŷ Newton wedi’i addurno ar gyfer y tymor, chwiliwch am goeden Creaduriaid Dinefwr a mwynhewch ffilm Nadolig yn y Tŷ Cwrw. Os bydd y tywydd yn ffafriol, ewch allan i losgi rhywfaint o egni ar daith gerdded aeafol o amgylch yr ystâd.

Llanerchaeron, Ceredigion
I deuluoedd sy’n mwynhau Nadolig traddodiadol gyda digon i’w ddarganfod, crwydrwch drwy’r fila Sioraidd sydd wedi’i haddurno ar gyfer y tymor cyn mynd i’r buarth i gwrdd â’r anifeiliaid. Archwiliwch gerbydau hen ffasiwn wrth i Cardi Cranks gymryd drosodd a mwynhewch hyd yn oed mwy o bethau Nadoligaidd annisgwyl yn ystod y penwythnosau Nadoligaidd ar eu newydd wedd.

Gardd Bodnant, Conwy
I blant sydd wrth eu bodd â chrefftau, mwynhewch ddiwrnod Nadoligaidd yn addurno bisgedi, gwneud addurniadau Nadolig a thostio malws melys yn yr ardd. Gyda llu o weithgareddau galw heibio a gweithgareddau hunan-dywys, gall teuluoedd ddewis beth hoffent ei wneud wrth grwydro Nadolig yr ardd sydd wedi’i ysbrydoli gan fyd natur.

Castell a Gardd Powis, Y Trallwng
I deuluoedd sy’n hoffi archwilio wrth eu pwysau, chwiliwch am hosanau Nadolig sydd wedi’u cuddio o amgylch yr ardd a dewch o hyd i olygfeydd o ryfeddod gaeafol yn yr Orendy. Mae’n wych i blant sy’n mwynhau antur y Nadolig yn yr awyr agored gyda digon o bethau Nadoligaidd annisgwyl ar hyd y ffordd.

Gerddi Dyffryn, ger Caerdydd
I deuluoedd sy’n mwynhau bod yn yr awyr agored yng nghanol byd natur, helpwch Siôn Corn i ddod o hyd i’w geirw sydd ar goll, wedi’u cuddio o amgylch yr ardd, cyn mynd i’r Hwb Gemau i herio’ch anwyliaid mewn amrywiaeth o hoff gemau'r teulu. Cewch fenthyg Sach Gefn Archwiliwr neu Sach Gefn Synhwyraidd am ddim i ychwanegu at yr antur, cyn cynhesu gyda siocled poeth yn y caffi.

Goleuadau Nadolig a digwyddiadau ar ôl iddi nosi
Wrth i olau dydd ddechrau pylu, profwch brofiadau Nadoligaidd ar ôl iddi nosi mewn cestyll a thai hanesyddol ledled Cymru. O dafluniadau ysblennydd sy’n goleuo muriau cestyll i ystafelloedd wedi’u haddurno’n hardd ac arddangosfeydd Nadoligaidd sy’n parhau gyda’r nos, profwch rai o leoedd mwyaf arbennig Cymru mewn goleuni newydd.
Castell a Gardd Powis, Y Trallwng
Mwynhewch yr awyrgylch wrth i dafluniadau Nadoligaidd oleuo muriau canoloesol trawiadol y castell ar 12–13 ac 18–22 Rhagfyr (mae angen archebu ymlaen llaw). Gwisgwch yn gynnes a mwynhewch y lliwiau, y goleuadau a’r animeiddiadau tymhorol sy’n rhoi persbectif newydd ar un o dirnodau hanesyddol mwyaf trawiadol Cymru.

Neuadd a Gardd Erddig, Wrecsam
Treuliwch noson aeafol yn Erddig yn ystod agoriadau hwyr arbennig rhwng 14 a 17 Rhagfyr. Crwydrwch yr ystafelloedd sydd wedi’u haddurno’n hardd wrth i olygfeydd o Carol Nadolig ddod yn fyw o’ch cwmpas, cyn mynd allan i fwynhau goleuadau disglair, arddangosfeydd Nadoligaidd ac awyrgylch clyd y buarthau ar ôl iddi dywyllu.

Tŷ Tredegar, Casnewydd
Wrth i’r nos ddisgyn dros Dŷ Tredegar, profwch yr arddangosfeydd Nadoligaidd mewn goleuni cwbl newydd yn ystod agoriadau hwyr dethol rhwng 14 a 23 Rhagfyr. Crwydrwch drwy ystafelloedd sydd wedi’u haddurno’n hardd a mwynhewch awyrgylch cynnes y tymor wrth i’r tŷ a’r gerddi ddisgleirio gyda’r nos.

Cwrdd â Siôn Corn a chymeriadau'r ŵyl yng Nghymru
O frecwastau Nadoligaidd ac ymweliadau â grotos traddodiadol i gyfarfyddiadau â’r Fari Lwyd a Scrooge, dewch i gwrdd â rhywun arbennig fel rhan o’ch diwrnod allan Nadoligaidd.
Neuadd a Gardd Erddig, Wrecsam
Dechreuwch y diwrnod gyda Brecwast gyda Siôn Corn ar ddyddiadau dethol ym mis Rhagfyr. Treuliwch amser gyda Siôn Corn, rhannwch straeon yr ŵyl a mwynhewch ddechrau cofiadwy i’r diwrnod cyn i bob plentyn dderbyn anrheg arbennig i fynd adref. Mae angen archebu ymlaen llaw.

Dinefwr, Sir Gaerfyrddin
Dewch i ymweld â Siôn Corn yn yr Ystafell Arlunio ar ddydd Sul drwy drefnu ymweliad ymlaen llaw. Pan fydd i ffwrdd, crwydrwch ei groto a dod o hyd i'r hyn y mae wedi’i adael ar ei ôl. Mae sesiynau penodol ar gyfer anghenion dysgu ychwanegol ar gael ar ddyddiadau dethol. Ar ôl y Nadolig, dewch yn ôl i gwrdd â’r Fari Lwyd ddireidus a phrofi traddodiad yr ŵyl sy'n unigryw i Gymru. Mae angen archebu ymlaen llaw.

Castell Y Waun a’r Ardd, Wrecsam
Ymwelwch â Groto o Chwith y Waun ar benwythnosau dethol a helpwch i ledaenu caredigrwydd yr ŵyl drwy gyfrannu bwyd neu nwyddau ymolchi i Fanc Bwyd Croesoswallt a’r Gororau. Ar ddyddiadau dethol, bydd Siôn Corn hefyd yn aros i ddiolch i chi.

Castell a Gardd Powis, Y Trallwng
Ymunwch â Siôn Corn am frecwast ar ddyddiadau dethol ym mis Rhagfyr. Gwyliwch wynebau’r rhai bach yn goleuo wrth i Siôn Corn gyrraedd yn llawn hud, cyn ymgynnull i glywed stori'r ŵyl wrth ymyl y goeden Nadolig. Mae angen archebu ymlaen llaw.

Tŷ'r Masnachwr Tuduraidd, Dinbych-y-pysgod
Dewch i gwrdd ag Arglwydd y Chwedlau ar ddyddiadau dethol ym mis Tachwedd a mis Rhagfyr a dewch o hyd i ochr fwy direidus Nadolig y Tuduriaid. Disgwyliwch rialtwch Nadoligaidd a digon o gymeriad wrth i chi wrando ar straeon o gyfnod y Tuduriaid a dilyn llwybr y doliau Tuduraidd, a bydd yr ymwelwyr iau yn mynd adref â thegan wedi’i ysbrydoli gan y Tuduriaid.

Tŷ Tredegar, Casnewydd
Cadwch lygad am Siôn Corn yn crwydro’r ardd, tra bo Scrooge y tu mewn yn gwneud ei orau i osgoi hwyl y Nadolig. Bydd y cymeriadau poblogaidd hyn yn ymddangos ar ddyddiadau dethol drwy gydol y tymor, gan ychwanegu eiliadau annisgwyl wrth i chi deithio drwy 500 mlynedd o Nadolig.

Llanerchaeron, Ceredigion
Dewch i gwrdd â Siôn Corn ar ddydd iau Sadwrn drwy gydol mis Rhagfyr fel rhan o benwythnosau’r Nadolig. Wedyn, crwydrwch y fila Sioraidd sydd wedi’i haddurno ar gyfer y tymor, darganfyddwch bethau annisgwyl Nadoligaidd o amgylch yr ystâd a chynheswch gyda gwin cynnes yn yr Iard Gwasanaethau.

Marchnadoedd Nadolig a siopa Nadolig yng Nghymru
Porwch drwy farchnadoedd Nadolig, dewch i gwrdd â chynhyrchwyr a chrefftwyr lleol, neu neilltuwch amser ar gyfer ychydig o siopa tymhorol wrth ymweld. O anrhegion wedi’u gwneud â llaw a bwyd lleol i grefftau unigryw a chanfyddiadau Nadoligaidd, mae digon o leoedd i ddod o hyd i rywbeth arbennig y Nadolig hwn.
Dinefwr, Sir Gaerfyrddin
Profwch Ffair Nadolig dridiau Dinefwr rhwng 20 a 22 Tachwedd, pan fydd yr iard a blaen Tŷ Newton yn llawn stondinau sy’n gwerthu popeth o emwaith wedi’i wneud â llaw i gyffeithiau lleol. Siopwch am yr anrheg berffaith wrth i gantorion carolau a chorau berfformio gyda Pharc Dinefwr yn ei ogoniant gaeafol yn gefndir.

Gardd Bodnant, Conwy
Yn lle'r stryd fawr brysur a pharciau manwerthu gorlawn, mwynhewch brofiad siopa Nadolig mwy hamddenol ym Modnant. Porwch drwy’r Siop, y Ganolfan Grefftau a’r siop lyfrau ail-law, a chymerwch eich amser yn dewis anrhegion addas o gasgliadau nwyddau cartref tymhorol, cynnyrch wedi’u crefftio’n lleol, llyfrau a danteithion blasus.

Llanerchaeron, Ceredigion
Os yw’n well gennych siopa Nadolig heb y torfeydd, porwch drwy ddetholiad gofalus o stondinau sy’n gwerthu cynnyrch lleol yn ystod penwythnosau Nadolig drwy gydol mis Rhagfyr. Crwydrwch y fila Sioraidd sydd wedi’i haddurno ar gyfer y tymor, cyn cynhesu gyda gwin cynnes yn yr Iard Gwasanaethau.

Gweithdai Nadolig a chrefftau'r ŵyl
Gwnewch rywbeth gwirioneddol bersonol y Nadolig hwn, o dorchau traddodiadol a chaligraffeg Nadoligaidd i beintio, gwneud printiau a dylunio blodau tymhorol. Archebwch eich lle mewn gweithdy creadigol a threuliwch ychydig o amser yn dysgu sgìl newydd wrth greu rhywbeth arbennig i fynd adref neu ei roi’n anrheg i rywun annwyl.
Gardd Bodnant, Conwy
Byddwch yn greadigol y Nadolig hwn gyda llu o weithdai Nadolig sydd wedi’u hysbrydoli gan yr ardd a thirwedd y gaeaf. Gwnewch dorch neu osodiad canol Nadoligaidd, rhowch gynnig ar argraffu lino, dyfrlliw neu bastelau, neu ymlaciwch mewn sesiwn Lliw a Llymaid Nadoligaidd. Mae angen archebu ymlaen llaw ar gyfer rhai gweithdai.

Neuadd a Gardd Erddig, Wrecsam
Dysgwch sgìl Nadoligaidd newydd y Nadolig hwn gyda gweithdai ymarferol ar wneud torchau a chaligraffeg fodern. Crëwch dorch gan ddefnyddio gwyrddni tymhorol neu dysgwch gelfyddyd defnyddio ysgrifbin dip draddodiadol, sy’n berffaith ar gyfer ychwanegu cyffyrddiad personol at eich cardiau Nadolig a’ch tagiau anrhegion. Mae angen archebu ymlaen llaw.

Castell Penrhyn a'r Ardd, Bangor
Beth am greu torch Nadolig hardd i groesawu gwesteion i’ch cartref, neu addurn blodau i ganol bwrdd y Nadolig? Bydd Florverly yn arwain y ddau weithdy, gan gynnig cyngor arbenigol a darparu’r holl ddeunyddiau sydd eu hangen arnoch. Rhaid archebu ymlaen llaw.

Llanerchaeron, Ceredigion
Gwnewch eich torch Nadolig eich hun gyda Meg, ein garddwr, gan ddefnyddio deunyddiau naturiol a gasglwyd o amgylch yr ystâd. Mae’r gweithdai dwyawr ym mis Rhagfyr yn cynnwys mins pei a mynediad i weld y fila Sioraidd sydd wedi’i haddurno. Mae angen archebu ymlaen llaw.

Teithiau cerdded gaeafol a diwrnodau Nadoligaidd tawelach yng Nghymru
Chwilio am ddiwrnod allan Nadoligaidd mwy llai prysur? Cewch ddianc rhag prysurdeb y tymor a chrwydro gerddi gaeafol, mynd ar deithiau cerdded heddychlon a chael profiadau Nadoligaidd hamddenol yn rhai o lefydd harddaf Cymru.
Gardd Bodnant, Conwy
Mwynhewch dro hamddenol drwy’r Ardd Aeafol, lle mae rhisgl lliwgar, aeron a llwyni yn cynnig arogleuon a diddordeb tymhorol drwy gydol y misoedd oerach. Dilynwch y llwybr cylchol byr drwy’r ardd uchaf, gyda lleoedd i oedi a mwynhau’r golygfeydd ar hyd y ffordd, ac yna, oedwch i weld yr arddangosfeydd Nadoligaidd sydd wedi’u hysbrydoli gan fyd natur a chynheswch yn y caffi.

Gerddi Dyffryn, ger Caerdydd
Ychydig bellter yn unig o Gaerdydd, mae Dyffryn yn cynnig hafan heddychlon rhag prysurdeb y Nadolig. Crwydrwch drwy’r gerddi rhestredig Gradd I, lle mae coed Nadolig addurnedig yn ychwanegu cyffyrddiad Nadoligaidd. Cymerwch eich amser yn crwydro ar gyflymder arafach, cyn cynhesu gyda siocled poeth yn y caffi.

Dinefwr, Sir Gaerfyrddin
Rhowch y prysurdeb Nadoligaidd o’r neilltu a mwynhewch daith gerdded aeafol drwy barcdir hanesyddol Dinefwr. Oedwch i wylio’r bywyd gwyllt, chwiliwch am y gyr o geirw brith a mwynhewch olygfeydd eang dros y dyffryn, gyda llwybrau yn cynnwys taith gerdded bywyd gwyllt tair milltir a thaith fyrrach drwy’r dirwedd a luniwyd gan ‘Capability’ Brown.

Castell Y Waun a’r Ardd, Wrecsam
Cewch eich croesawu gan wyrddni Nadoligaidd, coed addurnedig a’r canghennau uchelwydd traddodiadol, cyn mynd ymlaen i barcdir y Waun. Dewiswch rhwng dwy daith gerdded gylchol, gyda golygfeydd o’r castell tua Swydd Amwythig a Sir Gaer, neu lwybrau tawelach drwy goetir a pharcdir agored.

Tŷ'r Masnachwr Tuduraidd, Dinbych-y-pysgod
Camwch i brofiad Nadolig tawelach yng nghanol Dinbych-y-pysgod a chrwydrwch y tŷ hanesyddol bach sydd wedi’i addurno â gwyrddni naturiol, gyda gwledd Duduraidd wedi’i gosod ar gyfer y tymor. Wedyn, crwydrwch drwy strydoedd addurnedig Dinbych-y-pysgod neu dringwch Fryn y Castell i fwynhau golygfeydd gaeafol dros Fae Caerfyrddin ac Ynys Bŷr.

Pethau eraill o ddiddordeb i chi
Cymru
Darganfyddwch gestyll tylwyth teg, gerddi godidog a thirwedd Geltaidd wyllt sy’n drysorfa o chwedlau ar eich ymweliad â Chymru.
