Dewch i ddarganfod Cymru
Gwlad Geltaidd gyda gorffennol diwydiannol, yn llawn mythau, chwedlau, barddoniaeth a chân. Croeso i Gymru.
Diwrnodau allan i'r teulu yng Nghymru
Gyda gweithgareddau hwyl a digwyddiadau cyffrous, mae digonedd o ddiwrnodau gwych i’r teulu i’w cael yng Nghymru. Darganfyddwch gestyll crand, cwblhewch weithgareddau’r ’50 peth i’w gwneud cyn dy fod yn 11 ¾’, neu llosgwch ychydig o egni mewn ardaloedd chwarae naturiol.
Diwrnod i’r teulu yng Ngogledd Cymru
Castell Y Waun a’r Ardd
Dilynwch y llwybr wedi’i ysbrydoli gan lên gwerin Cymru, rhowch gynnig ar y gweithgareddau a chwblhewch yr her o gwmpas y castell a’r ardd. Wnewch chi lwyddo i ddod o hyd i’r gadair aur gyda chymorth y tylwyth teg? Dewch i wrando ar straeon hudolus gan y storïwr Jake Evans a rhedeg yn wyllt yn yr ardal chwarae yn Home Farm.
Neuadd a Gardd Erddig
Dilynwch y llwybr wedi’i ysbrydoli gan Ystafell y Llwythau yn Erddig i chwilio am greaduriaid hudol a bwystfilod dewr sy’n cuddio yn yr Arfbeisiau. Gwisgwch eich gwisgoedd Calan Gaeaf gorau ar 31 Hydref i ymuno â’r hwyl arswydus i’r teulu. Cofiwch ymweld â Ffau’r Blaidd, yr ardal chwarae naturiol.
Castell Penrhyn a'r Ardd
Dewch i ddathlu’r tymor drwy ymuno ag Antur Fawr yr Hydref yng Nghastell Penrhyn. Ewch i’r ardd i gwblhau’r helfa sborion a chwilio am holl drysorau’r hydref. Helpwch y garddwyr i lenwi’r berfâu gyda dail sydd wedi cwympo, gwnewch goron o ddail a llosgi rhywfaint o egni yn yr ardaloedd chwarae naturiol.
Plas Newydd a’r Ardd
Cerdded trwy ddail euraidd crensiog a sblasio mewn pyllau mwdlyd ar eich ffordd i ardal chwarae naturiol Coed y Llaethdy. Efallai y cewch gip ar wiwer goch ar hyd y ffordd! Eleni mae Plas Newydd yn cymryd rhan yn The Big Draw ar y thema ‘Darlunio Gyda'n Gilydd’. Dewch i gymryd rhan a bod yn greadigol yr hanner tymor hwn.
Plas yn Rhiw
Ewch i’r berllan yr hanner tymor hwn i gymryd rhan yn y digwyddiad Anturiaethau’r Berllan. Bydd y gweithgareddau tymhorol yn cynnwys arddangosiadau pladuro a gwasgu afalau ar ddiwrnodau penodol. Rhowch gynnig ar gelf wyllt, chwarae gêm o OXO ar thema natur a herio eich hun ar y cwrs rhwystrau ymhlith yr afalau sydd wedi cwympo.
Gardd Bodnant
Bydd y llwybr rhyngweithiol i deuluoedd wedi’i ysbrydoli gan arddangosfa awyr agored a chystadleuaeth Ffotograffydd Gerddi Rhyngwladol y Flwyddyn yn tanio dychymyg a chreadigrwydd y plant. Dewch i losgi rhywfaint o egni yn y ddrysfa helyg yn y Pen Pellaf, neidiwch dros gerrig sarn yn y Glyn a mwynhau’r llwybrau igam-ogam yn y parc chwarae.
Diwrnodau allan i'r teulu yng nghanolbarth Cymru
Castell a Gardd Powis
Trwy gydol hanner tymor bydd cyfle i chwilio ym mhob twll a chornel o’r castell a’r gerddi i weld sawl pwmpen y gallwch ei gweld ar y llwybr pwmpenni Calan Gaeaf. Ewch i iard y castell gyda’r nos rhwng 31 Hydref a 2 Tachwedd i weld tafluniadau bwganllyd a goleuadau arswydus yn goleuo muriau’r castell.
Llanerchaeron
Dilynwch y llwybr bwgan brain i archwilio’r stad amaethyddol hwn. Dewch i baratoi diod hudolus gwrach yn y gegin fwd neu ewch i’r bloc stablau i fwynhau’r ystafell chwarae. Cofiwch ddweud helo wrth yr anifeiliaid yn y buarth.
Dolaucothi
Ymwelwch ag unig gloddfa aur Rufeinig y DU. Ymunwch â thaith gerdded neu dilynwch y llwybr clywedol o amgylch iard y gloddfa i ddysgu rhagor am y Rhufeiniaid yn Sir Gaerfyrddin. Rhowch gynnig ar banio am aur ac archwiliwch arddangosiad ‘Trysorau Pumsaint’ yn y Ganolfan Faes, sy’n arddangos arteffactau 2,000 oed.
Dyddiau i’r teulu yn Ne Cymru
Tŷ Tredegar
Dilynwch y llwybr hydrefol drwy’r ardd gyda Rhubi y coblyn Cymreig. Cewch fenthyg sach gefn archwiliwr neu synhwyraidd yn cynnwys yr holl offer sydd ei angen arnoch i gysylltu â natur wrth gerdded o amgylch yr ardd gyda’ch teulu. Mae digon o bethau i’w gwneud tu mewn i’r tŷ ar ddiwrnod glawog gyda thri llawr i’w harchwilio.
Gerddi Dyffryn
Ydych chi’n ddigon dewr i ddilyn y llwybr natur ‘wnei di fentro’ i ddarganfod y pryfed sy’n byw yn yr ardd? Ydych chi’n ddigon dewr i roi eich llaw yn y blwch? Ydych chi’n ddigon dewr i chwilio am y ysbrydion miltroediaid? Mae dwy ardal chwarae naturiol i redeg yn wyllt ynddynt hefyd.
Dinefwr
Dewch i archwilio y tu mewn i Dŷ Newton sy’n llawn cysgodion mawr bendigedig sy’n gwneud iddi deimlo fel canol nos yng nghanol y dydd. Cewch wylio ffilmiau arswyd yn y seler gwrw, gwrando ar straeon yn yr ystafell gyfarch, tostio malws melys yn yr ardd ac ar 31 Hydref bydd disgo ffyn llachar i’w fwynhau.
Gardd Goedwig Colby
Ailgysylltwch â natur dros yr hanner tymor hwn drwy adeiladu ffeuau, chwarae gêm o ffyn pooh, neidio dros gerrig camu, a chwilota pyllau. Gyda dolydd eang, nentydd araf, a llwybrau cerdded yn y goedwig, mae’r ardd hon yn ddelfrydol ar gyfer anturwyr ifanc.
Pethau eraill o ddiddordeb i chi
Llefydd i fwyta a siopa yng Nghymru
Awydd cinio ysgafn neu ddiod boeth? Chwilio am yr anrheg berffaith? Mae rhywbeth at ddant pawb yn ein caffis, ystafelloedd te a siopau yng Nghymru.
Teithiau cerdded cyfeillgar pushcair
Dysgwch am ein llwybrau aml-ddefnydd yn y mannau rydym yn gofalu amdanynt ledled Cymru sy’n addas ar gyfer pramiau ac yn berffaith ar gyfer defnyddwyr cadeiriau olwyn a’r rhai gyda chymorth symudedd.
